نەتەوەیەكگرتووەكان: 85%ـی تێكڕای پەنابەرانی عێراق لە هەرێمی كوردستانن

ئاڤا نیوز

کۆمیسیۆنی باڵای نەتەوەیەکگرتووەکان بۆ کاروباری پەنابەران ڕایدەگەیێنێ، 85%ـی تێكڕای پەنابەران و ئاوارەكانی عێراق لە هەرێمی كوردستان دەژین.

 

وێنە گەورەكە: مانگانە کۆمیسیۆنی باڵای نەتەوەیەکگرتووەکان بۆ کاروباری پەنابەران، ڕاپۆرتی خۆی دەربارەی ڕەوشی پەنابەر و ئاوارەكان لە تێكڕای جیهان بڵاودەكاتەوە، لەو چوارچێوەیەشدا نوێترین ئاماری ئاوارەكانی عێراقی بڵاوكردۆتەوە و دەركەوتووە زۆربەی پەنابەران لە هەرێمی كوردستان نیشتەجێ كراون.

 

ڕاگەیێنراوی فەرمی: کۆمیسیۆنی باڵای نەتەوەیەکگرتووەکان بۆ کاروباری پەنابەران ڕایدەگەیێنێت، 286 هەزار و 171 پەنابەر و ئاوارە لە هەرێمی کوردستان دەژین، کە 85%ـی تێکڕای پەنابەرانی عێراق پێک دەهێنێت.

 

زانیاریی زیاتر: دەربارەی شوێنی نیشتەجێبوونی ئاوارەكان، کۆمیسیۆنەکە ڕوونیکردەوە 91 هەزار و 845 کەسیان لە شاری دهۆک دەژین، 41 هەزار و 791 کەس لە سلێمانی دەژین، زۆرترین ژمارەیان لە هەولێری پایتەختی هەرێمی کوردستانە کە ژمارەیان دەگاتە 152 هەزار و 535 کەس.

 

لەلایەکی دیکە: بەگوێرەی ڕاپۆرتەکە، زۆربەی ئاوارە و پەنابەرەکان خەڵکی ڕۆژئاوای کوردستان و سووریان کە ژمارەیان دەگاتە 266 هەزار 605 کەس، هەروەها 9 هەزار و 183 کەس خەڵکی ڕۆژهەڵاتی کوردستان و ئێرانن، 8 هەزار و 116 کەسی دیکەش خەڵکی باکووری کوردستان و تورکیان، هاوکات 1037 کەس خەڵکی فەڵەستین و 1230 کەسیشیان خەڵکی وڵاتانی دیکەن.