لە هەولێر پرۆژەیەکی نیشتەجێبوون ماوەی ساڵێکە کارەبای نیشتمانی نییە

ئاڤا نیوز

 

پرۆژەیەکی نیشتەجێبوون لە شاری هەولێر بەهۆی بەریەککەوتنی ڕێڕەوەکانی گواستنەوەی کارەبا لەگەڵ پرۆژەکانی دیکە کێشەی نەبوونی کارەبای نیشتمانییان هەیە، ئاڤا میدیا بەدواداچوونی بۆ کێشەکەیان کردووە کە لە ماوەی کەمتر لە مانگێک کێشەکەیان بۆ چارەسەر دەکرێت.

 

چیرۆکی سەرەکی: ماوەی ساڵێکە نزیکەی 800 خێزان لەنێو شووقەکانی پێشەنگ تاوەر لە هەولێر کارەبای نیشتمانییان نییە، خێزانەکان لە ڕێگەی ئاڤا میدیاوە داوای چارەسەرکردنی کێشەکەیان دەکەن.

 

زانیاریی بەدەستهاتوو: ژمارەیەک لەو خێزانانەی لە پێشەنگ تاوەر دەژین بە ئاڤا میدیایان ڕاگەیاند: کارەبای نیشتمانیان نییە و ناچارن مانگانە بە پارەیەکی زۆر کارەبای مۆلیدە بکڕن، هاوکات "لەبەر نەبوونی کارەبای نیشتمانی تووشی گرفت بووینەتەوە و جاری وایە ناتوانین خۆشمان بشۆیین".

 

لێدوانی فەرمی: ئەندازیار بەختیار قاسم، بەڕێوەبەری گشتیی کارەبای هەولێر بە ئاڤا میدیای گوت: ئێمە ڕەزامەندیمان بە خاوەنی پرۆژەکە داوە تاوەکو کارەبا بۆ تاوەرەکان ڕابکێشێت، هاوکات شوێنی تایبەتمان بۆ دیاریکردوون و خەریکی کارکردنن.

 

لەلایەکی دیکەوە: ئارام مالیک مەلا عەلی، یەکێک لە خاوەنەکانی پرۆژەی پێشەنگ تاوەر بە ئاڤا میدیای گوت: کێشەمان لە ڕێڕەوەکانی گواستنەوەی کارەبا هەبووە و دوو ڕێڕەو دەستنیشانکراون، ڕێڕەوی یەکەمیان بەهۆی بەریەککەوتنی ستوونەکانی کارەبای پرۆژەکە لەگەڵ پرۆژەکانی دیکە سەرکەتوو نەبووە، بۆیە لەکاتی پەسەندکردنی ڕێڕەوەی دووەمدا بە کەمتر لە مانگێک کارەبا دەگەیێنینە هاونیشتمانیان.