نەمسا 1000 یۆرۆ بە سووریاییەکان دەدات تاوەکو بگەڕێنەوە وڵاتەکەیان

ئاڤا نیوز

 

حکومەتی نەمسا ڕایگەیاند، وەک هاندانێک بۆ ئەو هاوڵاتییە سووریانەی لە نەمسا نیشتەجێن و دەیانەوێت بگەڕێنەوە وڵاتەکەیان، بڕی 1000 یۆرۆ کە دەکاتە نزیکەی 1050 دۆلاریان پێ دەدرێت.

ڕاگەیێنراوی فەرمی: کارل نیهامر، راوێژکاری حکومەتی نەمسا لە تۆڕی کۆمەڵایەتی ئێکس نوسیوویەتی، پاڵپشتی ئەو سووریاییانە دەکەن کە خوازیارن بگەڕێنەوە وڵاتەکەیان، ئێستاش دوای ڕووخانی دەسەڵاتی بەشار ئەسەد وڵاتەکەیان پێویستی بە ئاوەدانکردنەوە هەیە.

 
زانیاریی  زیاتر: تاوەکو ئێستا دیار نییە کە پەنابەرە سوورییەکانی نەمسا بەو بڕیارە ڕازی بوون یان نا، چونکە کۆمپانیا فڕۆکەوانییەکانی نەمسا گەشتەکانییان لەگەڵ سووریا راگرتووە، کۆچبەران بۆ گەڕانەوەیان ناچارن گەشتی ئاسمانی بۆ لوبنان یان بۆ تورکیا بکەن و دواتر بە ڕێگەی زەمینی بگەڕێنەوە سووریا، بەمەش تەنیا تێچووی گەشتەکەیان دەگاتە 1066 یۆرۆ یان 1120 دۆلار.

 

ئەمەش بزانە: ئەمە لە کاتێکدایە لە دوای رووداوەکانی 2011 زیاتر لە 13 ملیۆن سووریایی ئاوارە بوون و لە ناوخۆی وڵاتەکەش زیاتر لە 7 ملیۆن کەس روویان لە پارێزگاکانی ناوخۆی وڵاتەکەیان کردووە.

 

لەلایەکی دیکە: ئەمە لە کاتێکدایە راوێژکاری نەمسا وەک زۆرینەی دەسەڵاتدارانی ئەوروپا لە پارتێکی پارێزگارانە و لە لایەن پارتە ڕاستڕەوەکانەوە دووچاری گوشارێکی زۆر بووەتەوە، ئەوەش وایکردووەتەوە گۆڕانی زۆر بەسەر سیاسەتی کۆچبەری لە وڵاتانی ئەوروپادا بێت و هاوکات سووریاییەکان زۆرینەی ئەو ئاوارانەن کە داوای پەنابەریێتی دەکەن.