عێراق 50 ملیۆن لیتر نەوتی سپی بۆ هەرێمی کوردستان دەنێرێت

ئاڤا نیوز

حکومەتی عێراق بڕیاریدا 50 ملیۆن لیتر نەوتی سپی ڕەوانەی هەرێمی کوردستان بکات دوای ئەوەی شاندێکی وەزارەتی سامانە سروشتییەکانی هەرێمی کوردستان سەردانی بەغدای کرد و لەگەڵ لایەنی پەیوەندیداری وەزارەتی نەوتی عێراق لەسەر بابەتەکە کۆبووەوە.

وێنە گەورەکە: بەگوێرەی ڕێککەوتنی نێوان وەزارەتی سامانە سروشتییەکان و وەزارەتی نەوتی عێراق، دەبێت حکومەتی فیدراڵی هاوشێوەی پارێزگاکانی عێراق نەوتی سپی بۆ هەرێمی کوردستان بنێرێت.

لێدوانی فەرمی: نەهرۆ ڕواندزی، ئەندامی لیژنەی نەوت و گاز لە ئەنجوومەنی نوێنەرانی عێراق بۆ ئاڤا نیوز گوتی: دەبێت حکومەتی عێراق لە ساڵێکدا 200 ملیۆن لیتر نەوتی سپی بۆ هەرێمی کوردستان بنێرێت و بە ناردنی کاروانی دووەم، 100 ملیۆن لیتر دەمێنێت ڕەوانەی هەرێمی کوردستان بکرێت.

ژمارەکان وادەڵێن: تا ئێستا زیاتر لە 220 هەزار خێزان لەهەرێمی کوردستان لە وەرگرتنی نەوتی سپیی حکومەتی عێراق سوودمەند بوون، لە هەولێر  زیاتر لە 94 هەزار خێزان، سلێمانی و هەڵەبجە نزیکەی 50 هەزار خێزان و دهۆک زیاتر لە 76 هەزار خێزان.