زیاتر لە 21 هەزار پارچە زەوی لە سنووری هەولێر و دهۆک ئامادەن بۆ دابەشکردن

ئاڤا نیوز

پڕۆسەی دابەشکردنی زەوی دەستپێدەکات، لە زاخۆ ڕەزامەندی لەسەر ناو و پارچە زەوییەکان دراوە لە ماوەی دوو ڕۆژدا تیر و پشک بۆ دابەشکردنیان دەکرێت.

 

وێنە گەورەکە: لە قۆناغی یەکەمدا پێنج هەزار پارچە زەوی بە تاپۆوە ئامادەن بۆ دابەشکردن، بۆ قۆناغی دووەم سێ هەزار و 500 دۆنم ئامادەکراوە و ناوی 12 هەزار فەرمانبەر گەڕاوەتەوە بۆ ئەوەی ناویان بچێتە نێو تیر و پشک.

 

لێدوانی فەرمی: یونس محەممەد، سەرۆکی شارەوانی زاخۆ بە ئاڤا نیوزی گوت، "لە ماوەی 48 کاتژمێری داهاتوو پڕۆسەی تیر و پشک بۆ دابەشکردنی زەوی دەکرێت و ماوەی هەفتەیەک دەخایەنێت".

 

لەلایەکی دیکەوە: سەربەست مەولوود،  بەڕێوەبەری گشتیی کاروباری یاسایی لە وەزارەتی شارەوانی و گەشتوگوزار بە ئاڤا نیوزی ڕاگەیاند: "نۆ هەزار پارچە زەوی لەهەولێر و هەشت هەزار و 200 پارچە زەوی لە دهۆک ئامادەن، دوای وردبینییەکی دیکە بۆ ناوەکان لیستەکە دەگەڕێنرێتەوە شارەوانییەکان بۆ ئەوەی تیروپشک بۆ دابەشکردنیان بکرێت".

 

ئەوەی پێویستە بیزانیت: دوای 18 ساڵ ڕاگرتنی دابەشکردنی زەوی بەسەر فەرمانبەران، سەرۆکوەزیران مەسرور بارزانی هەفتەی ڕابردوو بڕیاری دا دەست بە پرۆسە بکرێتەوە، 200 هەزار فەرمانبەر و خانەنشین سوودمەند دەبن و هەر یەکەی 200 مەتر زەوی لە سنووری کارکردنی پێدەدرێت.