هەردوو وەزیری دەرەوەی عێراق و بەریتانیا چەند پرسێک تاوتوێ دەکەن

ئاڤا نیوز 

 

وەزیری دەرەوەی عێراق لەگەڵ هاوتا بەریتانیەکەی تاوتوێی چەند پرسێکیان کرد، لەنێویاندا پرسی ئەو عێراقییانەی کە بەشێوەیەکی نایاسایی نیشتەجێی بەریتانیان.

 

ڕاگه‌یێنراوی فه‌رمی: نووسینگەی ڕاگەیاندنی وەزارەتی دەرەوەی عێراق بڵاوی کردەوە: لە پەیوەندییەکی تەلەفۆنیدا، فوئاد حوسێن، وەزیری دەرەوەی عێراق لەگەڵ دەیڤید لامی، وەزیری دەرەوەی بەریتانیا، ڕەشنووسی ڕێککەوتنی شەراکەتی نێوان هەردوو وڵاتیان تاوتوێ کرد، جگە لە پرسی ئەو عێراقییانەی بەشێوەیەکی نایاسایی نیشتەجێی بەریتانیان.

 

زانیاری زیاتر: وەزیری دەرەوەی بەریتانیا جەختی کردەوە وڵاتەکەی هەوڵدەدات گرژییەکانی نێوان ئیسرائیل و لوبنان و ئێران بەرفراوان نەبێت و پروشکی ئەو جەنگە نەگاتە عێراق.

 

لەلایەکی دیکەوە: فوئاد حوسێن، وەزیری دەرەوەی عێراق ئاماژەی بەوە دا کە بەردەوامی پەرەسەندنی ئەم جەنگەی ئێستا ڕوودەدات لە ناوچەکە، ڕەنگە کارەساتی کۆمەڵایەتی و ئابووری و ئەمنیی نەخوازراوی لێبکەوێتەوە، بۆیە ئێستا لە هەموو کاتێک زیاتر پێویستە کۆدەنگیەک هەبێت کۆتایی بەململانییەکان بهێنێت.