عێراق: هەر کەسێک داڵدەی هاوڵاتیانی بیانی بدات بە یەک ساڵ زیندانی سزا دەدرێت

ئاڤا نیوز

 

وەزارەتی ناوخۆی عێراق سزای یەک ساڵ زیندانیکردن و ملیۆنێک دیناری عێراقی بۆ سەرپێچیکارانی یاسای نیشتەجێبوون ڕادەگەیەنێت و داوا لە خاوەن هۆتێل و میوانخانەکان دەکات، داڵدەی هیچ هاووڵاتییەکی بیانی نەدەن ئەگەر مۆڵەتی فەرمی نیشتەجێبوونی نەبێت.   

 

لێدوانی فەرمی: میقداد میری گوتەبێژی وەزارەتی ناوخۆی عێراق لە ڕاگەیێنراوێکدا داوای لە خاوەن پڕۆژەکانی نیشتەجێبوون، خاوەن هۆتێل، میوانخانە، پڕۆژەی گەورە و بچووک دەکات، ڕێگە نەدەن بە نیشتەجێبوون و دامەزراندنی هاووڵاتیانی بیانی بەبێ مۆڵەتی فەرمی نیشتەجێبوون،  بەپێچەوانەوە ئەم کارە بە سەرپێچی لە یاسای نیشتەجێبوونی ژمارە 76 ـی ساڵی 2017 دادەنرێت.

 

زانیاریی زیاتر: میری ئاماژەی بەوەشکرد، بەپێی ماددەی 41 ـی یاسای سزادانی عێراقی، هەر کەسێک داڵدە یان کار بە هاووڵاتییەکی بیانی بکات بە بێ مۆڵەتی فەرمی نیشتەجێبوون، بۆ ماوەی ساڵێک زیندانی دەکرێت و نزیکەی یەک ملیۆن دیناریش سزای دارایی دەدرێت.