حکومەت بۆ هەناردەکردنەوەی نەوت داوای هاوکاری لە کۆمپانیاکان دەکات

ئاڤا نیوز

حکومەتی هەرێمی کوردستان بۆ دەستپێکردنەوە بە هەناردەکردنی نەوت داوای هاوکاری و هەماهەنگی و کاری هاوبەش لە کۆمپانیاکانی نەوت و گاز دەکات.

وێنە گەورەکە: نزیکەی 11 مانگە هەناردەکردنی نەوتی هەرێمی کوردستان بۆ بازاڕەکانی جیهان ڕاگیراوە، بەم هۆیەوە 10 تاوەکو 12 ملیار دۆلار زیان بە حکومەتی عێراق و هەرێمی کوردستان کەوتووە. 

ڕاگەیێنراوی فەرمی: ئەمڕۆ دووشەممە شاندی دانوستانکاری حکومەتی هەرێمی کوردستان و تیمی باڵای وەزارەتی سامانە سروشتییەکان، لە هەولێر لەگەڵ کۆمپانیاکانی گواستنەوە و بەرهەمهێنانی نەوت و گاز کۆبوونەوە.

نێوەڕۆکی کۆبوونەوەکە: لە کۆبوونەوەکەدا باسی گفتوگۆکانی نێوان هەولێر و بەغدا سەبارەت بە یاسای بودجە و نەوت کراوە. جەختکراوەتەوە ئەوەی لەسەر حکومەتی هەرێم بووە ئەنجامی داوە تاوەکو گفتوگۆکان بگەنە ڕێککەوتن و چارەسەر.

خواستی هەرێم بۆ هەرچی زوو دەستپێکردنەوەی هەناردەکردنی نەوت خراوەتەڕوو، بە جۆرێک ئەم پرسە پێویستی بە ڕێگاچارەی هاوبەش و لێکتێگەیشتنی هاوبەشی هەموو لایەکە سەبارەت بە تێچووی بەرهەمهێنان و گواستنەوەی نەوت. هەماهەنگی و کاری هاوبەشیش بەپێویست زانراوە.

 

بۆچی گرنگە: یەکێک لە کێشەکانی دەستپێکردنەوەی هەناردەکردنی نەوت پەیوەستە بە تێچووی دەرهێنان و گواستنەوەی نەوت و، ئەو گرێبەستانەی لە نێوان حکومەتی هەرێم ‌و کۆمپانیاکان کراون.