وادەی پڕکردنەوەی فۆرمی وەرگرتنی زەویی درێژدەکرێتەوە

ئاڤا نیوز

وادەی پڕکردنەوە و گەڕاندنەوەی فۆرمی وەرگرتنی زەوی هەفتەیەک درێژدەکرێتەوە، بۆ ئەوەی سەرجەم فەرمانبەران و خانەنشینان پێڕابگەن و هیچ کەسێک مافی نەفەوتێت.

وێنە گەورەکە: ڕۆژی 18-09-2024 دوایین کاتە بۆ  گەڕاندنەوەی فۆڕمی وەرگرتنی زەوی، بەڵام تاوەکو ئێستا تەنیا 50%ـی فەرمانبەران و خانەنشینان فۆرمیان بۆ وەزارەتەکانیان گەڕاندووەتەوە، بەشێک لە وەزارەتەکانیش فۆڕمە پڕکراوەکانیان بۆ وەزارەتی شارەوانی نەناردووە.

 

لێدوانی فەرمی: سەربەست مەولوود، بەڕێوەبەری گشتیی کاروباری یاسایی لە وەزارەتی شارەوانی بە ئاڤا نیوزی ڕاگەیاند: "ئەگەر تا سبەی سەرجەم ئەو فەرمانبەر و خانەنشینانەی فۆڕمی وەرگرتنیان پڕکردووەتەوە، نەیانتوانی بیگەڕێننەوە ماوەی هەفتەیەک وادەکە درێژدەکرێتەوە."

 

ئەوەی پێویستە بیزانیت: نزیکەی 40%ـی زەویی لەسەرجەم شارەوانییەکان ئامادەن بۆ دابەشکردن، بەشێک لە زەوییەکان بە هۆکاری ئەوەی ڕەگەزی زەوییەکە پێویستی بە گۆڕانکارییە تاوەکو ئێستا ئامادە نەکراوە، کۆی پرۆسەکە دوو مانگی پێویستە.

باکگراوند: نزیکەی 200 هەزار فەرمانبەر و خانەنشین لە وەرگرتنی زەوی سوودمەند دەبن و هەر کەسێک لە سنووری شوێنی دەوامکردنی 200 مەتری پێدەدرێت، بەگوێری پلانی حکومەتیش پێش کۆتایی ئەمساڵ و دروست لەماوەی 65 ڕۆژی داهاتوودا ئامادەکارییەکان تەواودەبن و دەست بە پرۆسەکە دەکرێت.