هێزەكانی ئێران دوو كۆڵبەری كورد ڕاودەنێن و لە شاخ دەكەونە خوارەوە

ئاڤا نیوز

دوو كۆڵبەر لە شاخەكانی ڕۆژهەڵاتی كوردستان  كەوتوونەتە خوارەوە و بەسەختی بریندار بوون، بەگوتەی ڕێكخراوی هەنگاو بۆ مافەكانی مرۆڤ، لەلایەن هێزەكانی ئێرانەوە ڕاونراون و تەقەیان لێكراوە، بەهۆیەوە لە شاخێكی بەرز كەوتوونەتە خوارەوە.

چیرۆكی سەرەكیی: لە نێوان سنووری ڕۆژهەڵات و باشووری كوردستان، ژمارەیەكی زۆر لە هاووڵاتیانی ڕۆژهەڵاتی كوردستان كاری كۆڵبەری دەكەن، بەڵام بەردەوام بەدەست هێزە ئەمنییەکانی ئێران دەناڵێنن و هێرشیان دەکەنە سەر.

لێدوانی فەرمی: ڕێكخراوی هەنگاو  بۆ مافەكانی مرۆڤ ڕايگەیاند: كۆڵبەرێكی  تەمەن 30 ساڵی خەڵكی شاری سنە، بەهۆی كەوتنەخوارەوەی لە بەرزایییەكانی سنووری تەتە بەسەختی بریندار بووە. ئەم كۆڵبەرە لە كاتی ڕاوەدونانی لەلایەن هێزە سەربازییەكانی ئێران لە شاخێكی بەرز كەوتووەتە خوارەوە.

"هەمان ڕۆژ كۆڵبەرێكی دیكە بە ناوی بیلال شاهڕۆخ تەمەن 24 ساڵ، لە كاتی ڕاوەدوونانی لەلایەن هێزەكانی ئێران، لە بەرزایی سنوورەكانی نەوسوود كەوتووەتە خوارەوە و قاچێکی بەسەختی بریندار بووە".