فرۆشتنی دوو جۆر دەرمان لە هەرێمی كوردستان قەدەغە دەكرێت

ئاڤا نیوز  

دامەزراوەی كۆنتڕۆڵی جۆریی دەرمان، لەبارەی دوو جۆر دەرمانەوە هۆشداریی دەدات و بڕیاری قەدەغەكردنی فرۆشتنیان دەدات.

بۆچی گرنگە: دامەزراوەی كۆنتڕۆڵی جۆریی دەرمان، بە بەردەوامی پشكنین بۆ هەموو جۆرە دەرمانێك دەكات، هەر دەرمانێك كاریگەریی نەرێنی و زیانی ڕاستەوخۆ و لاوەكی بۆ مرۆڤ هەبێت، بڕیاری قەدەغەكردنی دەدات.

بڵاوكراوەی فەرمی: دامەزراوەی كۆنتڕۆڵی جۆریی دەرمان ڕایگەیاند: بە مەبەستی زیاتر هەڵسەنگاندن و شیکردنەوەی تاقیگەیی بڕیارمان دا بە ڕاگرتنی فرۆشتنی دوو بەرهەمی دەرمانسازیی تەواوکەریی خۆراکی بە شێوەژەمی دەرمانسازیی قەترەی دەم کە ماددەی میلاتۆنینیان تێدایە.

زانیاریی زیاتر: دامەزراوەی كۆنتڕۆڵی جۆری دەرمان ئاشكراشی دەكات بەرهەمە دەرمانسازییەکان بە ناوەکانی (HONORTONIN drops) بە ژماره باجی (HNR1715) دروستکراوی کارگەی (HONOR) و (melatonin drops) بە ژمارە باجی (23B038) دروستکراوی کارگەی (inalme) دوای ئەوەی لەلایەن تیمەکانی چاودێریی بازاڕی بەڕێوەبەرایەتیی KMCA پشکنینی فیزیکیان بۆ ئەنجامدرا دەرکەوت کە تەنۆلکەی بینراو "visible particle" یان تێدایە.

ئەوەش بزانە: داوا لەسەرجەم دەرمانخانە و کۆگاکانی دەرمان لە سەرتاسەری هەرێمی كوردستان دەكرێت، لە ئەمڕۆ بەدواوە فرۆشتنی ئەو دوو بەرهەمە ڕابگرن، تاوەکو ئەنجامی تاقیگەیی نوێ لەسەر ئەو دوو بەرهەمە دەردەچێت.