فڕۆكەخانەیەكی دیمەشق بۆردوومان دەكرێت

ئاڤا دیجیتاڵ

فڕۆکەی جەنگیی بۆردوومانی فڕۆکەخانەی "مزە" دەکەن لە دیمەشقی پایتەختی سووریا، ئیسرائیل ڕەتیدەکاتەوە هێرشەکەی ئەنجام دابێت، حکومەتی سووریاش پشتڕاستیدەکاتەوە و دەڵێت بەرپەرچیان داوەتەوە و دەشڵێت "دوو فڕۆكەی بێ فڕۆكەوانیان خستووەتە خوارەوە".

 

ڕاگەیێنراوی فەرمی: میدیا فەرمییەکانی سووریا بڵاویانکردەوە: بەرگریی ئاسمانیی بەرپەرچی هێرشێکی دووژمنیان داوەتەوە لە دەوروبەری دیمەشق، هاوكات وەزارەتی بەرگریی سووریا ئەوەی ڕاگەیاندووە "سیستەمی بەرگری ئاسمانی بەرگری سووریا كاتژمێر 2:10 خولەكی پاش نیوەڕۆی ئەمڕۆ لە ڕۆژئاوای دیمەشق بە ئاڕاستەی جۆلان دوو فڕۆكەی بێ فڕۆكەوانی خستووەتە خوارەوە كە ئاسمانی سووریایان بەزاندووە".

لەلایەکی دیکەوە: ڕوانگەی سووریا بۆ مافەکانی مرۆڤ ڕایگەیاند: هێرشەکە لەلایەن ئیسرائیلەوە بە فڕۆکەی جەنگی کراوە و دەوروبەری ناوچەی سەیدە زەینەبی گرتووەتەوە لە دیمەشق کە فڕۆکەخانەی "مزە" ی تێدایە و بۆردوومانەکەش کوژراو و برینداری لێکەوتووەتەوە.

بۆچوونی لایەنی بەرامبەر: هەرچەندە میدیاکانی سووریا و ڕوانگەی سووریاش باس لەوە دەکەن ئیسرائیل هێرشەکەی ئەنجامداوە، بەڵام دوو سەرچاوەی بەرپرسی ئیسرائیل بۆ چەند میدیایەک ڕەتیانکردووەتەوە ئەوان هێرشەکەیان ئەنجام دابێت.

باکگراوند: ڕۆژی چوارشەممە ئیسرائیل هێرشی کردەسەر شاری حمس لە سووریا و بەپێی ئامارێکی ڕوانگەی سووریا لە هێرشەکەدا 11 کەس کوژراون کە دوانیان ئەندامی حیزبوڵڵا بوون و حەوتیشیان سڤیل بوون.