وەزارەتی دارایی کورتهێنانی مووچەی هێزە ئەمنییەکان پڕدەکاتەوە

ئاڤا نیوز

وەزارەتی دارایی و ئابووری کورتهێنانی  مووچەی هێزە ئەمنییەکان پڕدەکاتەوە و هیچ مووچەخۆرێک نامێنێت لە دوو ڕۆژی داهاتوودا مووچە وەرنەگرێت.

وێنە گەورەکە: ئەمڕۆ سێشەممە وەزارەتی دارایی عێراق  بڕی 676 ملیار دیناری بۆ مووچەی مانگەکانی پێنج و شەشی پێشمەرگە و هێزە ئەمنییەکانی نارد، بەڵام زیاتر لە 26 ملیار دیناری کەم بوو.

لێدوانی فەرمی: سەرچاوەیەک لە وەزارەتی دارایی و ئابووری بە ئاڤا نیوزی گوت: "هێشتا هۆکاری نەناردنی 26 ملیارەکە دیارنییە، لەگەڵ وەزارەتی دارایی عێراق لە هەوڵداین بۆ چارەسەرکردنی کێشەکە و پێویستە بە خشتە بۆمان ڕوون بکەنەوە مووچەی کێ و بە چ هۆکارێک نەنێردراوە".

زانیاریی زیاتر: تاوەکو لە بەغداوە پارەکە دەنێردرێت وەزارەتی دارایی و ئابووری هەرێمی کوردستان کورتهێنانەکە پڕدەکاتەوە بۆ ئەوەی پارەکە بەشی مووچەی سەرجەم پێشمەرگە و هێزە ئەمنییەکان بکات.

ئەمەش بزانە: سبەی چوارشەممە دەست بە دابەشکردنی مووچەی هێزە ئەمنییەکان دەکرێت و لە ماوەی دوو ڕۆژدا تەواو دەبێت.