ئۆفیسی دەستپێشخەری و پەیوەندییەکان و قەتەر فاوەندەیشن یاداشتێکی لێکتێگەیشتن واژۆ دەکەن

ئاڤا نیوز

لەماوەی شەش مانگی ڕابردوودا ئۆفیسی دەستپێشخەری و پەیوەندییەکان ڕاهێنانی بە هەزاران قوتابی زانکۆ لە هەرێمی کوردستان و گەنجانی تاراوگە کردووە، ئەمڕۆ بە بەشداری بەرپرسانی باڵای هەرێمی کوردستان، عێراق و کونسوڵی وڵاتان بڕوانامەی بەشداریکردنیان پێدەدرێت.

وێنە گەورەکە: (ئۆفیسی دەستپێشخەری و پەیوەندییەکان - OIC)، بڕوانامەی بەشداریکردن دەبەخشێتە لە چوار هەزار و 200 گەنجی نێوخۆ و دەرەوە، کە لە خولێکی شەش مانگە بەشدار بوون، هەروەها یاداشتێکی لێکتێگەیشتن لەگەڵ  (قەتەر فاوەندەیشن) واژۆ دەکات.

لێدوانی فەرمی: پێشەوا ئەحمەد، سەرپەرشتیاری پڕۆژەکە بە ئاڤا نیوزی گوت: "لێکتێگەیشتنەکە بۆ بەرەوپێشبردنی تواناکانی گەنجانە لە هەرێمی کوردستان و پشتیوانی قوتابیانی زانکۆ و ڕاهێنانیان لە وڵاتی قەتەر لەبوارە جیاوازەکانی زانستی و پەروەردە و گەشەپێدانی کۆمەڵایەتی."

ئەوەی پێویستە بیزانیت: یەکەمجارە دامەزراوەی (قەتەر فاوەندەیشن) دێتە هەرێمی کوردستان و لەگەڵ ئۆفیسی دەستپێشخەری و پەیوەندییەکانی حکومەتی هەرێمی کوردستان کاری بەیەکەوەییان دەبێت.

درێژەی ڕاپۆت

 

 ئیڤێنتەکە شەش دیداری سەرەکی لە خۆدەگرێت و وەڵامی کۆمەڵێک پرسیاری هەنووکەیی پەیوەست بە پەیوەندی حکومەتی هەرێمی کوردستان لەگەڵ وڵاتانی جیهان، هەوڵەکان بۆ پشخستنی کەرتی پەروەردە و خوێندن و کۆمەڵێک پرسی دیکە باسدەکرێن.

میوانانی شەش دیدارەکە بەمشێوەیە دەبن:-

دیداری یەکەم: هێمن لهۆنی، بەرپرسی ئۆفیسی دەستپێشخەری و پەیوەندییەکان لە نووسینگەی سەرۆکی حکومەتی هەرێمی کوردستان.

دیداری دووەم: حوسێن عەلی ساڵح، کونسوڵی گشتیی قەتەر لە هەرێمی کوردستان.
دیداری سێیەم: د.ئارام قادر، وەزیری خوێندنی باڵا و توێژینەوەی زانستیی حکومەتی هەرێمی کوردستان.

دیداری چوارەم: د.ئالان حەمە سەعید، وەزیری پەروەردەی حکومەتی هەرێمی کوردستان.

دیداری پێنجەم: پێشەوا ئەحمەد، یەكێک لە ڕێکخەرانی ئیڤێنت و ئەندامی ئۆفیسسی دەستپێشخەری و پەیوەندییەکان.

دیداری شەشەم: سازان مەندەلاوی، یەكێک لە ڕێکخەرانی ئیڤێنت و ئەندامی ئۆفیسسی دەستپێشخەری و پەیوەندییەکان.