باڵیۆزی ئێران لە عێراق: سەرۆک بارزانی وەک سەرکردەیەکی گەورە ڕۆڵێکی گرنگی لە پڕۆسەی سیاسیدا هەیە

ئاڤا نیوز

 

باڵیۆزی کۆماری ئیسلامیی ئێران بەگرنگییەوە لە سەردانەکەی سەرۆک بارزانی بۆ بەغدا دەڕوانێت و هیوای خواست سەردانەکە ببێتە هۆکاری چارەسەکردنی کێشە هەڵپەسێرداوەکان و پرسی هەڵبژاردنی سەرۆکێکی نوێ بۆ پەرلەمانی عێراق.

 

وێنە گەورەکە: ڕۆژانی 3 و 4ی تەممووزی 2024، سەرۆک بارزانی بە سەردانێک لە بەغدابوو، لە دووەم ڕۆژی سەردانەکەی ژمارەیەک دیدار و کۆبوونەوەی هەبوو، لەنێویاندا لەگەڵ محەمەد کازم ئال سادق باڵیۆزی ئێران لە عێراق کۆبووەوە، جگە لە چەند پرسێک، پەیوەندییە دووقۆڵییەکانی نێوانیان تاوتوێ کرد.

 

لێدوانی فەرمی: محەممەد کازم ئال سادق، باڵیۆزی کۆماری ئیسلامیی ئێران لە عێراق لەبارەی گرنگی سەردانەکەی سەرۆک بارزانی بە ئاڤا نیوزی ڕاگەیاند: "هیوادارم سەردانەکەی ببێتە هۆکارێک بۆ یەکلاکردنەوەی زۆرێک لە دۆسیە هەڵپەسێردراوەکانی نێوان حکومەتی فیدراڵی و حکومەتی هەرێمی کوردستان، هاوکات ڕۆڵی هەبێت لە چارەسەرکردنی هەڵبژاردنی سەرۆکێکی نوێ بۆ پەرلەمانی عێراق".

 

بابەتی ستراتیژی: محەمەد کازم ئال سادق، ئاماژەی بە پەیوەندییەکانی نێوان ئێران و هەرێمی کوردستان کرد و ڕایگەیاند: سەردانەکەی کاک مەسعود هاوکار دەبێت لە بەهێزکردنی پەیوەندییە ئابووری و کولتووری و سیاسی و ئەمنییەکان، کێشەیەکی تایبەت لەنێوان ئێران و عێراق و هەرێمی کوردستاندا نییە، تەنیا کێشەیەکی ئەمنی هەبوو کە ئەویشمان لە ڕێگەی ڕێککەوتنێکی ئەمنی چارەسەر کرد و ئەنجامی باشی هەبوو و بە ئاراستەیەکی دروستیشدا دەڕوات.

 

خاڵی ئەرێنی: سەبارەت بە بە پێگەی و ڕۆڵی سەرۆک بارزانی ڕایگەیاند: بەڕێز مەسعود بارزانی سەرکردەیەکی گەورە و گرنگە لە عێراق، ڕۆڵێکی گەورەی هەبووە لە پڕۆسەی سیاسی. بە سروشتی خۆی ئەم سەردانە هاوکار دەبێت لە چارەسەرکردنی هەندێک بابەت، هاوکات کاریگەریی ئەرێنیی باشیشی دەبێت.

 

لەلایەکی دیکە: دوای کۆبوونەوەی سەرۆک بارزانی و باڵیۆزی ئێران لە عێراق بارەگای بارزانی ڕایگەیاند، هەردووکیان بیروڕایان لەبارەی بارودۆخی سیاسیی عێراق و ناوچەکە ئاڵوگۆڕ کرد و سەرۆک بارزانیش ئامانج و هۆکاری سەردانەکەی بۆ بەغدا بۆ باڵیۆزی ئێران خستەڕوو.