ئیتاڵیا و ئیسپانیا کێبڕکێی مسۆگەرکردنی بلیتێکی دیکەی قۆناغی 16ـی یۆرۆ دەکەن

 ئاڤا نیوز 

 

ئەمشەو سێ یاری لە گەڕی دووەمی قۆناغی کۆمەڵەکانی یۆرۆی 2024 بەڕێوە دەچێت، چێنەریش لە یارییەکەی ئیتاڵیا و  ئیسپانیا ئامادە دەبێت.

 

وێنە گەورەکە: 17ـەمین وەشانی یۆرۆ بە بەشداریی 24 هەڵبژاردە لە ئەڵمانیا بەڕێوەدەچێت،  ئەڵمانیا بلیتێکی مسۆگەرکردووە، لەلایەک ئینگڵاند و لەلایەکی دیکە ئیتاڵیا و ئیسپانیا کێبڕکێی مسۆگەرکردنی بلیتێکی دیکەی قۆناغی 16 دەکەن.

 

شێوازی جێبەجێکردن: کاتژمێر چواری ئێوارە لەسەر یاریگەی میونشن فووتبۆڵ ئەرێنا، هەڵبژاردەی سلۆڤینیا و سێربیا بەیەک دەگەن، ئەم تاقیکردنەوەیە بۆ هیچ کامیان ئاسان نابێت، چونکە لە دواین 8 یاریی نێوانیان 6 یاری بە یەکسانبوون تەواوبووە و یەکی بردنەوەیەکیان تۆمارکردووە.

کاتژمێر حەوتی ئێوارە لەسەر یاریگەی فڕانکفۆرت ئەرینا، ئینگڵاند ڕووبەڕووی دانیمارک دەبێتەوە، هەڵبژاردەی سێ شێرەکە بە ئامانجی زامنکردنی بلیتێکی دیکەی قۆناغی 16 یاری دەکەن، دانیمارک بۆ قەرەبووی یەکسانبوونی لە گەڕی یەکەم بەرامبەر سلۆڤینیا ڕووبەڕووی هاری کەین و هاوڕێکانی دەوەستن.

 

مێژوو لە بەرژەوەندی سێ شێرەکەیە، لە 24 یاریی ڕابردوو 14 جار لە دانیمارکیان بردووەتەوە و 41 جار تۆڕیان هەژاندوون، دانیمارک تەنیا 5 بردنەوەی تۆمارکردووە و لە 5 بۆنەشدا یەکسانبوون.

 

کاتژمێر 10:00ـی شەو یاریگەی ڤێلتیس ئارینا دەبێتە شانۆی ڕووبەڕووبوونەوەیەکی ئاگرین لە نێوان ئیتاڵیا و ئیسپانیا، جگە لەوەی هەردوو هەڵبژاردە بۆ مسۆگەرکردنی بلیتێکی دیکەی قۆناغی 16 ڕکابەری دەکەن، بە دەرفەتێک بۆ نمایشکردنی خۆیان وەک پاڵێوراوی دیاری نازناوەکە دادەنرێت.

 

مێژووی ڕووبەڕووبوونەوەیان ڕوو لە ماتادۆرە 14 جار پشتی ئازۆرییەکانیان لە ئەرز داوە، ئیتاڵیا لە 11 یارییدا سەرکەوتنی تۆمارکردووە و لە 14 یارییشدا یەکسانبوون.

 

ئەوەی پێویستە بیزانیت: ئاڤا سپۆڕت سەرجەم یارییەکانی ئەم پاڵەوانێتییە ڕووماڵ دەکات، ئەمڕۆ کاتژمێر 6:30 و  09:00 ئاسام جەباری ستۆدیۆی تایبەت بە شیکردنەوەی یارییەکانی دەبێت.

لێدوانی فەرمی: چێنەر عەبدولقادر، بەڕێوەبەری ئاڤا سپۆرت بۆ ڕووماڵی پاڵەوانێتییەکە لە ئەڵمانیایە و گوتی، "بە ڕێگەوەم بۆ ئەوەی ئەمشەو لە یاریی نێوان ئیسپانیا و ئیتاڵیا ئامادەبم، کاتژمێر 12:00 لایڤم دەبێت و شڕۆڤەی یارییەکە دەکەم."