ژمارەی ئاوارەکان لە هایتی گەیشتە 600 هەزار کەس

ئاڤا نیوز

 

لە ئاماریکی نوێی نەتەوەیەکگرتووەکان، ژمارەی ئاوارەکان لە هایتی کە بەهۆی تووندوتیژی باندەکانەوە ماڵەکانیان چۆڵ دەکەن بۆ 600 هەزار کەس بەرزبووەوە.

 

وێنە گەورەکە: بەهۆی پەرەسەندنی تووندوتیژیی باندەکانەوە ژمارەی ئاوارە ناوخۆییەکانی هایتی لە مانگی ئازارەوە بە ڕێژەی 60٪ بەرزبووەتەوە و ئێستا نزیکەی 600 هەزار کەسە، بەپێی ئامارەکانی ڕێکخراوی نێودەوڵەتیی کۆچ. 

 

ژمارەکان وا دەڵێن: بەگوێرەی ڕاپۆرتێکی ڕێکخراوی نێودەوڵەتیی کۆچ کە ئەمڕۆ سێشەممە بڵاویکردووەتەوە، ئێستا وڵاتەکە 578 هەزار و 74 کەسی ئاوارە لەخۆدەگرێت، لەکاتێکدا لە سەرەتای مانگی ئاداردا 362 هەزار و 551 کەس ئاوارە بوون، هاوکات کۆی ژمارەی دانیشتووانی وڵاتەکە دەگاتە 10 ملیۆن کەس.

 

ڕاگەیێنراوی فەرمی: بەڕێوەبەری نوێنەرایەتیی نەتەوە یەکگرتووەکان لە هایتی، فیلیپ برانچات ڕایگەیاندووە، "ئەو ژمارانەی ئەمڕۆ دەیبینین، دەرئەنجامی ساڵانێکە لە پەرەسەندنی تووندوتیژی کە لە مانگی شوباتدا گەیشتە لووتکەیەکی نوێ و کاریگەریی مرۆیی کارەساتباری دروست کردووە".

 

ئەوەی ئێستا ڕوودەدات: "قەیرانی بەردەوام لە هایتی خەڵکی زیاتر ناچار دەکات ماڵەکانیان بەجێبێڵن بەبێ ئەوەی هیچ کەلوپەلێک لەگەڵ خۆیان ببەن".