خەلیل قەدشی: ل نزیک دێ ل گەل جەلالی بەرنامەیەکێ پێشکێشکەین

ئاڤا دیجیتاڵ 

هونەرمەندێ کومێدی  خەلیل قەدشی راگەهاند؛ د تەمەنێ ٦٧ سالیێ دا ژی یێ بەردەوامە لسەر کارێ خۆ یێ هونەری و ل نزیک دێ ل ئاڤا رادیۆ دەست ب بەرنامەیەکێ هەڤبەش ل گەل هونەرمەند جەلالی کەت.

 

خەلیل مستەفا یێ بەرنیاس ب خەلیل قەدشی ئێك ژ دامەزرێنەرێن كۆما پەیاما دەڤەرا ئامێدیێ یە بۆ ئاڤا میدیا دیاركر؛ مل ب ملێ جەلال عەبدولای و هژمارەکا هونەرمەندێن دی یێن دیار كۆما پەیاما ئامێدیێ دامەزراندبوو و 32 سالە خزمەتا هونەرێ کوردی ب گشتی و ب تایبەت هونەرێ کۆمیدیایێ دکەن.

 

خەلیل قەدشی کو ب خەلۆ ژی بەرنیاسە،ل سالا 1957 هاتیە سەر دونیایێ، خەلكێ كۆمەلگەها قەدشێ یا سەر ب ناحیا سەرسنكێ ل سنورێ قەزا ئامێدیێ یە و خێزاندارە و بابێ سێ كچا و كورەكێ یە ب ناڤێن(گۆلیزار، چنار، دێژین، هەلكەفت)، ئەو دبێژیت: ڤیانا من بۆ هەمی زارۆكێن من وەكی ئێكە و حەژێكەرێ خارنێن دەستێن خێزانا خۆ مە ب تایبەت تەشریبێ و ئیپبراخا و ماسی، راستە دبێژن یێ ئیپبراخا بخۆت ژ هەڤژینا، خۆ د ترسیت، لێ ئەز ناترسم بتنێ رێزێ لێ دگرم.

 

هونەرمەند خەلیل دیارکر ژی؛ راستە ل سالا 1993 پرۆگرامەك ل رادیۆیا سەرسنكێ هەبوو، وی دەمی هەتا نۆكە ل چ رادیۆیا كار نەكریە، لێ مزگینیێ ددەنە خەلكێ خۆ یێ خۆشتڤی ل نزیك دێ ل رادیۆیا ئاڤا هێنە دخزمەتا خەلكێ دەڤەرا بەهدینان دا و باشترین و کاریگەرترین پرۆگرامێ رۆژانە یێ رادیۆیێ پێشكێشی حەژێكەرێن خۆ كەن.

 

دەربارەی ناڤەرۆکا بەرنامەی، هونەرمەند خەلیل قەدشی دبێژیت: بلا جارێ بمینیت، لێ بۆ ڤێ قوناغێ ئەزیێ پشتراستم دێ ب شێوازەکێ دی خزمەتا خەلکێ خۆ کەین.