خۆڕاگری بەرامبەر شێرپەنجە؛ بەڵگەفیلمی کچەی شاخ لە هەولێر نمایش دەکرێت

ئاڤا دیجیتاڵ

بەڵگەفیلمی کچەی شاخ، کە ژیانی ژنێک نیشان دەدات لەکاتی سەختییەکانی نەخۆشی شێرپەنجە، لە ڕۆژی جیهانی شێرپەنجە لە هەولێر نمایش دەکرێت، یەکێک لە تایبەتمەندییەکانی ئەوەیە ئەکتەری سەرەکی خۆی تووشبووی شێرپەنجەیە و بەڵگەفیلمەکەش سەرجەم دیمەنەکانی بە یەکجار وێنەگیراون.

بۆچی گرنگە: ڕۆژی چواری شوباتی هەموو ساڵێک وەک ڕۆژی جیهانی شێرپەنجە دیاریکراوە بۆ بڵاوکردنەوەی هۆشیاریی دەربارەی شێرپەنجە و هەوڵدان بۆ ڕێگریکردن و چارەسەرکردنی نەخۆشییەکە. نمایشکردنی بەڵگەفیلمەکە لە هەمان ڕۆژ دانراوە بۆ نیشاندانی خۆڕاگری ژنێکی کورد کە ئەکتەری سەرەکییە و لە ژیانی ڕاستەقینەدا تووشی نەخۆشی شێرپەنجە بووە.

ئامانجی بەڵگەفیلمەکە بۆ هۆشیارکردنەوەیە سەبارەت بە شێرپەنجە و هۆکارێکە بۆ ئەوەی خانمان باشتر ئاگاداری خۆیان بن و بتوانن بەسەر هەموو سەختییەکاندا زاڵببن.

لێدوانی فەرمی: "ئەکتەری سەرەکی فیلمەکە ناوی ئاهەنگ کاوانییە، خۆی دووجار تووشی شێرپەنجە بووە و ئەو ڕۆڵانی دیکەش کە دراوە بە ئەکتەرەکانی دیکە زۆر نزیکن لە ڕاستی ژیانی خۆیان"، ئەمە گوتەی ئاسۆ کەریم، دەرهێنەری بەڵگەفیلمەکەیە بۆ ئاڤا.

ئەوەی پێوستە بیزانیت: هەموو ئەو دیمەنانەی لە بەڵگەفیلمەکەدا هەن بە یەکجار وێنەگیراون و هیچ دیمەنێک دووبارە نەکراوەتەوە بۆ ئەوەی ڕاستی ژیانی کارەکتەرەکان وەک خۆی بە بینەر بگات.

وێنەگرتنی فیلمەکە چوار بۆ پێنج مانگی پێچووە چونکە ستافی بەرهەمهێنەرانی فیلمەکە خۆیان لەگەڵ سیستمی ژیانی ئەکتەری سەرەکی گونجاندووە کە بەهۆی نەخۆشییەکەیەوە نەیتوانیووە هەموو کات ئامادەبێت بۆ وێنەگرتن.

ئەوەی ئێستا ڕوودەدات: ئەمشەو کاتژمێر 7:00ـی ئێوارە دەست بە نمایشکردنی فیلمەکە کرا لە سینەما ئیمپایەر لە هەولێر.