ئوردن ڕێککەوتنە نەوتییەکەی لەگەڵ عێراق درێژ دەکاتەوە

ئاڤا نیوز

 
وەزارەتی وزە و سامانە سرووشتییەكانی ئوردن، یاداشتی لێکتێگەیشتنی دابینکردنی نەوت لە لایەن عێراقەوە، "بە هەمان مەرج و نرخ" بۆ ماوەی سێ مانگ درێژ کردەوە.

ڕاگەیێنراوی فەرمی: ئیمان عەواد، بەڕێوەبەری کەرتی نەوت و غازی سرووشتی لە وەزارەتی وزە و سامانە سرووشتییەكانی ئوردن ڕایگەیاند: ئێستا هەماهەنگی لەگەڵ عێراق بەردەوامە بۆ یەکلاکردنەوەی ڕێکاری بارکردنی نەوتی خاو لە کەرکوکەوە بۆ پاڵاوگەی نەوتی ئوردن لە زەرقا.

ئەوەی پێویستە بیزانیت: لە ساڵی 2006، ئوردن و عێراق ڕێککەوتنێکیان واژۆ کرد بۆ دابینکردنی 10 هەزار بەرمیل نەوت لە ڕۆژێکدا بۆ ئوردن بە داشکاندن، سەرەتا بۆ هەر بەرمیلێک 18 دۆلار لە خوار نرخی جیهانییەوە بوو، بەڵام لە ساڵی 2008 بۆ هەر بەرمیلێک بۆ 22 دۆلار بەرز کرایەوە.

باکگراوند: لە ساڵی 2015 تا 2019 ڕێککەوتنەکە لەسەر هەناردەکردن نەوت ڕاگیرا، چونکە داعش ڕۆژئاوای عێراق کە هاوسنوورە لەگەڵ ئوردن، کۆنتڕۆڵ کرد. 

ئەوەی پێشبینی دەکرێت: پێشبینی دەکرێت لە چەند ڕۆژی ئایندەدا دەست بە پڕۆسەی هەناردەکردنەوەکە بکرێت.