كۆشی سپی: بە ڕێگەی گونجاو وەڵامی هێرشەكەی ئێران دەدەینەوە

ئاڤا دیجیتاڵ

جۆن كێربی گوتەبێژی كۆشكی سپی ئەمریكا ڕایگەیاند، وڵاتەكەی كار لەسەر ئەوە دەكات بە ڕێگەیەكی گونجاو وەڵامی ئەو هێرشە بداتەوە كە كرایە سەر بنكەكەی لە ئوردن و بووە هۆی كوژرانی سێ سەربازی ئەمریكی، دوای ئەوەی جۆ بایدن سەرۆكی ئەمریكا گروپەكانی نزیك لە ئێرانی بە هێرشەكە تۆمەتبار كرد. 

 

 چیرۆكی سەرەكی: جۆن كێربی گوتەبێژی كۆشكی سپی و ئاسایشی نیشتیمانی ئەمریكا، لە چاوپێكەوتنێكدا لەگەڵ تۆڕی هەواڵی "سی ئێن ئێن" ڕایگەیاند: سەرۆك بایدن وەڵامی هێرشەكەی یەكشەممە بەڕێگەی گونجاو دەداتەوە بەڵام كاتەكەی دیار نییە،  گوتیشی "بەڵام هەوڵنادەین لەگەڵ ئێران بكەوینە شەڕەوە چونكە نامانەوێت ململانێكان لە ڕۆژهەڵاتی ناوەڕاست فراوانتر بێت".

لێدوانی فەرمی: ڕۆژی یەكشەممە 28-1-2024 وەزارەتی بەرگری ئەمریكا پێنتاگۆن كوژرانی سێ سەربازی ئەمریكی لە بنكەیەكی هێزەكانیان لە ئوردن ڕاگەیاند جگە لە برینداربوونی 34 سەربازی دیكە، كە لە ڕێگەی درۆنی بۆمبڕێژكراوەوە كرابوونە ئامانج.

میدیای ئەمریكا لەبارەی هێرشەكەوە زانیاری ئەوەی بڵاوكردەوە كە بنكەكە "تی 22 " ە و بنكەیەكی سەربازی بچووك بووە لەنزیك سنووری سووریا.

لەلایەكی دیكەوە: جۆن كێربی پێشتر ڕایگەیاندبوو سەرۆكی ئەمریكا فەرمانیكردووە ئامادەبن بۆ وەڵامدانەوەی هێرشەكەی ئێران بە ڕێگەیەكی گونجاو.

بەگوتەی جۆن كێربی، هێرشەكان بۆ سەر هێزەكانی ئەمریكا لەم هەفتەیەی ڕابردوودا زیادیانكردووە، بەڵام ئەمریكا ڕێگە بەو هەڕەشانە نادات بەردەوامییان هەبێت كە بەرژەوەندییەكانی كردووەتە ئامانج بەبێ وەڵام تێپەڕن. 

 

 باكگراوند: لەوكاتەوەی شەڕی غەززە لە حەوتی ئۆكتۆبەری ساڵی ڕابردووەوە دەستیپێكردووە، هێرشەكان بۆ سەر هێزەكانی ئەمریكا و هاوپەیمانان لە ناوچەكە زیادیانكردووە، بەتایبەت لە عێراق و سووریا و لوبنان، بەشێكیان گروپەكانی نزیك لە ئێران بەرپرسیارێتییان ڕاگەیاندووە و ئەمریكاش ڕاستەوخۆ ئەوانی تۆمەتبار كردووە.

بەپێی ئامارێك كە هێزەكانی هاوپەیمانان بڵاویانكردووەتەوە، لە 17 ی ئۆكتۆبەری ساڵی ڕابردووەوە 158 جار هێرش كراوەتە سەر هێزەكانی ئەمریكا و هاوپەیمانان لە عێراق و سوریا.