ئێران چوار زیندانیی سیاسیی کورد لەسێدارە دەدات

ئاڤا دیجیتاڵ

چوار زیندانیی سیاسیی کورد کە پێشمەرگەی کۆمەڵەی شۆڕشگێڕی زەحمەتکێشانی کوردستان بوون، بەیانی ئەمڕۆ لەلایەن دەەسەڵاتی دادوەری ئێران لەسێدارەدانیان راگەیێنرا.

چیرۆکی سەرەکی: چوار کوردی رۆژهەڵاتی کوردستان بە ناوەکانی پژمان فاتیحی تەمەن 29 ساڵ و خەڵکی شاری کامێران، موحسین مەزڵووم تەمەن 27 ساڵ و خەڵکی شاری مەهاباد، وەفا ئازەربار تەمەن 26 ساڵ و خەڵکی شاری بۆکان، محەممەد (هەژیر) فەرامەرزی تەمەن 28 ساڵ و خەڵکی دێولان، کە 23-7-2022 لەلایەن دەزگا ئەمنییەکانەوە دەستگیرکرابوون، بەیانی ئەمڕۆ دووشەممە 29-1-2024 لەسێدارەدانیان راگەیێنرا.

لێدوانی فەرمی: رێکخراوی هەنگاو بۆ مافەکانی مرۆڤ لە راپۆرتێکدا بڵاویکردەوە، ئەو گەنجە کوردانە دوای 18 مانگ دەستبەسەربوونیان مافی دەستڕاگەیشتن بە پارێزەر و چاوپێکەوتن لەگەڵ بنەماڵە و کەسوکاریان و، تەنانەت پەیوەندیی تەلەفۆنیشیان نەبوو.

زانیاری زیاتر: زیندانییەکان کە پێشمەرگەی کۆمەڵەی شۆڕشگێڕی زەحمەتکێشانی کوردستان بوون، لە 18-9-2023 لەلایەن دادگای شۆڕشی تارانەوە بەتۆمەتی "هاوکاری و سیخوڕی بۆ ئیسرائیل" سزای لە سێدارەیان بەسەردا سەپێنرابوو.

ئەوەی پێویستە بزانیت: وەک رێکخراوی هەنگاو لە ڕاپۆرتەکەیدا ئاماژەی پێداوە، ئەو چوار گەنجە کوردە ئەندامی حیزبی کۆمەڵەی شۆڕشگێڕی زەحمەتکێشانی کوردستانی ئێران بوون.

 

بۆچوونی بەرامبەر: کۆمەڵەی شۆڕشگێڕی زەحمەتکێشانی کوردستانی ئێران و کەسوکاریان ئەو تۆمەتەی وەزارەتی ئیتڵاعاتی ئێرانیان رەتکردەوە. لە کاتی دەرکردنی سزاکەشدا ناڕەزایەتی زۆری رێکخراوەکانی مافی مرۆڤ و چالاکڤانانی سیاسی و مەدەنی لێکەوتەوە.

 

باکگراوند: چوار پێشمەرگەکەی کۆمەڵە رۆژی 23-7-2022، لە گوندی "یەنگەجە" لە نزیک ناوچەی سۆمای برادۆستی پارێزگای ئورمییە، لەلایەن هێزە ئەمنییەکانی ئێرانەوە دەستگیرکران.