هێزەکانی ئەمریکا لە بنکەی عەین ئەسەد بۆردوومان دەکرێن

ئاڤا دیجیتاڵ

 

جارێکی دیکە بنکەی سەربازیی عەین ئەسەد لەلایەن "گرووپە چەکدارە شیعەکان کە خۆیان بە مقاوەمەی ئیسلامی لە عێراق" دەناسێنن، بە فڕۆکەی بێفڕۆکەوان بۆردوومان کرا.

 

چیرۆکە سەرەکییەکە: ئەمشەو 27-1-2024 جارێکی دیکە بنکەی سەربازیی عەین ئەسەد لە ئەنبار کرایە ئامانج. بنکەکە لەلایەن هێزەکانی ئەمریکا بەکاردەهێنرێت و مقاوەمەی ئیسلامیش هێرشەکەی لەئەستۆ گرتووە.

 

لێدوانی فەرمی: کەمێک پێش ئێستا، میدیاکانی نزیک لە حەشدی شەعبی هەواڵی هێرشکردنە سەر بنکەی سەربازیی عەین ئەسەدیان لە ئەنبار بڵاوکردەوە و گوتیان: "بە فڕۆکەی بیفڕۆکەوان هێرشمانکردووەتە سەر بنکەی سەربازیی هێزەکانی ئەمریکا لە عەین ئەسەد".

زانیاریی زیاتر: واشنتن لە کاردانەوەی هێرشەکاندا، چەندینجار هێرشی ئاسمانی کردووەتەوە سەر گرووپە چەکدارەکانی نزیک لە ئێران و بنکە و بارەگاکانیان بۆردوومان دەکات. 

باکگراوند: لە دەستپێکی جەنگی حەماس و ئیسرائیل لە تشرینی یەکەمی ساڵی ڕابردووەوە، توندوتیژییەکان لە ڕۆژهەڵاتی ناوەڕاست هەڵکشاون، زیاتر لە 150 هێرش کراونەتە سەر ئەمریکا و هێزی هاوپەیمانان لە عێراق و سووریا. ئەم هێرشانە لەکاتێکدان لایەنە شیعەکان لە عێراق داوای رۆیشتنی ئەمریکا لە عێراق دەکەن. هەروەها محەممەد شیاع سوودانی، سەرۆکوەزیرانی عێراق، بەهەمانشێوە داوا لە هاوپەیمانان دەکات وڵاتەکە بەجێبهێڵن و پێیوایە ئەم چۆڵکردنە ئاسایشی وڵاتەکە مسۆگەر دەکات.