بەندیخانەکانی عێراق بوونەتە گۆڕستانی زیندانیان

ئاڤا نیوز

 

سەرچاوەکانی مافی مرۆڤ لە عێراق ئاشکرایان کردووە لە 48 کاتژمێری ڕابردوو سێ گیراو لە بەندیخانەی کەرخ گیانیان لەدەست داوە و چەندین نەخۆشیش بڵاو بووەتەوە.

 

وێنە گەورەکە: لە دوو ڕۆژی ڕابردوودا، سێ حاڵەتی گیانلەدەستدان لەناو بەندیخانەی ناوەندیی کەرخ لە بەغدا تۆمار کراون، هاوکات باری تەندروستیی 10 گیراوی دیکەش تێک چووە و چەندین نەخۆشیش لەنێو گیراوەکان بڵاو بووەتەوە. 

 

لێدوانی فەرمی: سەرچاوەیەکی مافی مرۆڤی عێراقی بە "عەرەبی جەدید"ی ڕاگەیاندووە، "ئەو سێ کەسە بە هۆی بەدخۆراکی و پشتگوێخستنی پزیشکی گیانیان لەدەست داوە، لە کاتێکدا تەمەنیان لەنێوان 20 بۆ 30 ساڵ بووە".

 

زانیاریی زیاتر: دەیان گیراوی بەندیخانەی کەرخ تووشی هەوکردنی ڕیخۆڵە و هەناسەتەنگی و نەخۆشیی پێست بوونە، بێ ئەوەی بەرپرسانی بەندیخانەکە ڕێوشوێنێکی خێرا بۆ چارەسەریان بگرنەبەر.

 

ئەمەش بزانە: عومەر فەرحان، بەڕێوەبەری سەنتەری عێراقی بۆ بەدیکۆمێنتکردنی تاوانەکانی جەنگ، پشتبەستوو بە سکاڵای گیراوان ئاشکرای کردووە، "لە بەندیخانەکانی کەرخی پیاوان، کەرخی ژنان، تاجی و حوت لە ناسریە، بەردەوام پێشێلکاری بەرامبەر گیراوان دەکرێت و تۆڵەسەندنەوەش هەیە".

 

ئەوەی لەوبارەوەیەوە دەگوترێت: ئەرشەد ساڵحی، سەرۆکی لیژنەی مافی مرۆڤ لە ئەنجوومەنی نوێنەرانی عێراق پێشێلکاریی بەندیخانەی کەرخ و باقی زیندانەکانی حکومەت پشتڕاست دەکاتەوە کە "بەندیخانەکانی عێراق ستانداردی نێودەوڵەتییان نییە و ئێستا زیاتر لە 80 هەزار گیراویان تێدایە کە ڕۆژانە نزیکەی 11 دۆلار خەرجی هەر گیراوێکە و ئەمەش بووەتە بارگرانییەکی زۆر لەسەر دەوڵەت".

 

گۆشەیەکی دیکەی دیمەنەکە: وەزارەتی دەرەوەی ئەمریکاش لە ڕاپۆرتی ساڵانی خۆی لەسەر مافی مرۆڤ، ئاماژەی بە خراپی دۆخی بەندیخانەکانی عێراق کردووە و دەڵێت "ڕێژەی قەرەباڵغی بەندیخانەکان 400%ی تێپەڕاندووە".