ئێران تیمی کەشتییە دەستبەسەرکراوەکە ئازاد دەکات

ئاڤا نیوز

ئێران ڕایگەیاند تیمی ئەو کەشتییە ئازاد دەکات، کە دوو هەفتە لەمەوپێش بە تۆمەتی بەزاندنی سنوورە ئاوییەکان دەستی بە سەردا گرتبوو.

چیرۆکی سەرەکی: ڕۆژی 13-4-2024 سوپای پاسدارانی ئێران لە گەرووی هورمز دەستی بە سەر کەشتیی MSC Aries گرت کە ئاڵای پورتوگالی پێوەبوو، ئێران ڕایگەیاند پەیوەندیی بە ئیسرائیلەوە هەبووە. کەشتییەکە 25 سەرنشینی تێدا بوو و سەرجەمیان دەستبەسەر کران. 

ڕاگەیێنراوی فەرمی: وەزارەتی دەرەوەی ئێران ڕایگەیاند حوسێن ئەمیر عەبدوڵاهیان، وەزیری دەرەوەی ئێران لەگەڵ هاوتا پورتوگالییەکەیدا، لە ڕێگەی تەلەفۆنەوە گفتوگۆی کردووە و پێی ڕاگەیاندووە وەک پرسێکی مرۆیی سەیری بابەتەکە دەکەن و بەم زووانە سەرنشینانی کەشتییەکە ئازاد دەکرێن.

وێنە گەورەکە: بەهۆی گرژییەکانی ڕۆژهەڵاتی ناوەڕاست، بەتایبەتیش گرژییەکانی نێوان ئیسرائیل و ئێران، تائێستا چەند جارێک ئێران دەستی بەسەر کەشتی بازرگانی و سەربازی لە گەرووی هورمز و کەنداوی عەرەب دا گرتووە.