هەفتەی داهاتوو عێراق و ئێران گفتوگۆ لەبارەی کێشەی ئاو دەکەن

ئاڤا نیوز

وەزیری سەرچاوەکانی ئاوی عێراق ڕایدەگەیێنێت، هەفتەی داهاتوو لەگەڵ شاندێکی باڵای ئێران پرسی چارەسەری ئاو تاوتوێ دەکەن.

وێنە گەورەکە: لە دووەم ڕۆژی دیداری سلێمانی پرسی ژینگە و کەمبوونەوەی ئاو لە عێراق تیشکی خرایەسەر، کە ئێستا ڕێژەی گلدانەوەی ئاو لە عێراق 59 ملیار مەتر سێجای لە ڕێژەی پێویستی ساڵانە کەمە. 

لێدوانی فەرمی: عەون زیاب، وەزیری سەرچاوەکانی ئاوی عێراق لە پانێڵەکەدا جەختی کردەوە کە عێراق بەدوای چارەسەری كێشەكانی ئاودا دەگەڕێت، لێکۆڵینەوەکان ئەو ڕاستییە دەردەخەن کەموکوڕی هەیە لە چارەسەرکردنی کێشەکە و دەبێت ڕێگایەكی نوێ بدۆزرێتەوە بۆ چارەسەرکردنی.

بۆچی گرنگە: زیاتر لە چوار ساڵە ئێران ڕێڕەوی 40 ڕووباری گۆڕیوە کە وەرزی بوون و وەک سەرچاوەی ئاوی لە عێراق سەیر دەکران.

ئەوەی پێویستە بیزانیت: پێشتر ڕێژەی 12% ـی سەرچاوەی ئاوی عێراق لە ئێرانەوە بوو، بەڵام ئێستا وڵاتەکە ڕێرەوی ڕووبارەکانی گۆڕیوە و پڕۆژەی لەسەر دروستکردوون، ئەمەش کێشەیەکی گەورەی ڕووبەڕووی عێراق کردووەتەوە، لەکاتێکدا تورکیاش بە گرتنەوەی ئاوی دیجلە فشارێکی زۆری لەسەر عێراق دروست کردووە.