سەرۆکی کاتیی پەرلەمانی عێراق ڕەوایەتی بە هێرشی ئێران بۆ سەر ئیسرائیل دەدات

ئاڤا نیوز 

سەرۆکی کاتیی ئەنجوومەنی نوێنەرانی عێراق، ڕەوایەتی بە هێرشی ئێران بۆ سەر ئیسرائیل دەدات و دەڵێت، بەپێی یاسا و ڕێسا نێودەوڵەتییەکان مافی سروشتی خۆیەتی وەڵامی هەر هێرشێک بداتەوە کە دەکرێتە سەری.

ڕاگەیێنراوی فەرمی: موحسین مەندەلاوی دەڵێت: "وەڵامی ئێران بۆ بەئامانجگرتنی باڵیۆزخانەکەی لە دیمەشقی پایتەختی سووریا، مافێکی سروشتییە و بەپێی یاساو ڕێسا نێودەوڵەتییەکان مسۆگەر کراوە". 

زانیاریی زیاتر: مەندەلاوی کە کوردی فەیلی شیعەمەزهەبە، دووپاتی دەکاتەوە "گەلانی عەرەب و ئیسلامی مافی  خۆیانە بەرگری لە خۆیان و بەرژەوەندییەکانیان بکەن لە بەرامبەر هێرشی هێزە داگیرکەرەکاندا".

لەلایەکی دیکەوە: مەندەلاوی داوا لە وڵاتانی عەرەبی و ئیسلامی دەکات بەردەوام بن لە پشتیوانیکردنی فەڵەستین بۆ دامەزراندنی دەوڵەتی سەربەخۆ بە جۆرێک قودس پایتەختی بێت.