لە خورماتوو نزیکەی 200 سەگ بە "خواردنی ژەهراوی" لەنێودەبرێن

ئاڤا دیجیتاڵ

 

زۆربوونی سەگی بێلانە لەنێو شارەکان، دانیشتووانی سەنتەری قەزای خورماتووی هەراسان کردووە. بەرپرسانی قەزاکە لیژنەیەکیان لە تیمەکانی پۆلیس، شارەوانی و ڤێترنەری بۆ "لەناوبردنی سەگەکان" پێکهێناوە. سەرۆکی لیژنەکە دەڵێت: "تاوەکو ئێستا نزیکەی 200  سەگیان لەنێوبردووە و پرۆسەکەش بەردەوام دەبێت".

 

وێنە گەورەکە: لە هەرێمی کوردستان لەبری لەنێوبردن، شێڵتەر بۆ سەگە بێلانەکان دروست دەکرێت. تیمەکانی پارێزگا و ئیدارە سەربەخۆکان سەگی بێلانەی کوچە و کۆڵانەکان کۆدەکەنەوە و دەیانخە ئەو شێڵتەرانەوە. جگە لەوەی لە شوێنێکی تایبەت کۆدەکرێنەوە و خواردنیان بۆ دابین دەکرێت، مەترسی هێرشکردنە سەر هاونیشتمانیانیش کەمدەبێتەوە.

 

لە ناوچە دابڕێنراوەکانی هەرێمی کوردستان و قەزای خورماتوو بەنموونە، شێڵتەر بۆ کۆکردنەوەی سەگی کوچە و کۆڵانەکان نییە و بۆ کەمکردنەوەی مەترسییەکانیان، ڕێگەی دیکە بەکاردەهێنرێت. ئەو تیمانە سەگەکان دەگرن و "خواردنی ژەهراویی"ـیان پێدەدەن بۆ ئەوەی "بیانکوژن". بەپێی زانیارییەکانی پەیامنێری ئاڤا میدیا لە کەرکووک، لاشەی سەگ لە نێو کۆڵانەکانی خورماتوو کەوتوون و بۆنێکی ناوخۆشیان بڵاوکردووەتەوە. ئەمە جگە لەوەی کە بۆگەنبوونی ئەو لاشانە دەبێتە هۆی دەیان نەخۆشی. 

 

ئامانجەکە چییە: ژمارەی سەگە بێلانەکانی سەنتەری قەزای خورماتوو هەزار سەگی تێپەڕاندووە. "هەڵمەتێکمان بۆ کەمکردنەوەی مەترسیی سەگە بێلانەکان ڕاگەیاندووە و بەردەوام دەبین". ئەمە  گوتەی حوسێن عەلی، بەڕێوەبەری پۆلیسی خورماتوو بوو بۆ ئاڤا میدیا. 

 

لێدوانی فەرمی: "تاوەکو ئێستاش تیمەکان لە "مردار"کردنی سەگەکان بە ڕێگەی جیاواز بەردەوامن". نەجم هادی، سەرپەرشتیاری لیژنەی لەنێوبردنی سەگە بێلانەکان لە خورماتوو بە ئاڤا میدیای گوت.

زیاتر گوتیشی: "سەگان هێرشیان دەکردە سەر منداڵان و زیانیان پێدەگەیاندن، لەنێوبردنی ئەو سەگانە لەسەر داوای خەڵک بووە. ڕۆژانە ژمارەی سەگەکان زیادی دەکرد و خەڵکی قەزاکە هەراسان دەبوون".

لە لایەکی دیکەوە: هێمن بارزان، چالاکوانی مەدەنی لە سنووری قەزای خورماتوو، لەنێوبردنی سەگەکانی بە دیاردەیەکی ناشارستانی وەسف کرد. "لە ماوەی ڕابردوودا سەگەکان بە چەک دەکوژران و بە بەرچاوی خەڵکیشەوە ئازار دەدران، بەڵام ئێستا لە ڕێگەی ژەهراوییکردنەوە سەگەکان لەنێو دەبرێن و لاشەکانیان لەنێو کۆڵانەکان جێدەهێڵرێن". ئاڤا میدیا پرسیاری چۆنیەتی ژەهراوییکردنی سەگەکانی لەو چالاکوانە کرد و گوتی: "مریشکی ژەهراوییان پێدەدرێت".