سکووڵی ڕۆژنامەوانی ئاڤا کتێبێک لەبارەی فەیک نیوز بڵاودەکاتەوە

ئاڤا نیوز

 

سکووڵی ڕۆژنامەوانی ئاڤا لە ڕۆژی جیهانیی وردبینیکردنی زانیارییەکاندا، یەکەم بەرهەم و کتێبی خۆی لەبارەی فەیک نیوزەوە پێشکەشی ڕۆژنامەنووسان و ئارەزوومەندانی بواری ڕۆژنامەوانی دەکات.

 

وێنە گەورەکە: ڕۆژی 02-04-2024 ڕۆژی جیهانیی وردبینیکردنی زانیارییەکانە، کە لەساڵی 2022ـەوە لەلایەن تۆڕی نێودەوڵەتیی وردبینیکردنی زانیارییەکان IFCN دیاریکراوە، بەمەبەستی بڵاوکردنەوەی هۆشیاریی لەبارەی فەیک نیوز و زانیاری ناڕاست و ساختە. بەوپێیەی دیاردەی هەواڵ و زانیاریی ساختە لەئەمڕۆدا گرفتێکی جیهانییە و کێشەی گەورەی بۆ بواری ڕۆژنامەوانی دروستکردووە، یەکەم قوربانیش بەهۆیەوە شێواندنی ڕاستییە کە وا دەکات ڕای گشتی بە هەڵەدا ببرێت.

 

بۆچی گرنگە: "ڕێبەری ڕۆژنامەوانی ڕووبەڕووبوونەوەی فەیک نیوز" ناوی ئەو کتێبەیە کە سکووڵی ڕۆژنامەوانی ئاڤا وەکو نۆبەرەی کارەکانی خۆی بڵاوی دەکاتەوە، کە دەبێتە یەکەم سەرچاوەی ڕۆژنامەوانی و زانستی لەو بوارەدا لە هەرێمی کوردستان. 

 

لێدوانی فەرمی: فرمان عەبدولڕەحمان، بەڕێوەبەری سکووڵی ڕۆژنامەوانی ئاڤا ڕایگەیاند: ئامانجی سکووڵەکەمان بەهێزکردنی سەرخان و ژێرخانی ڕۆژنامەوانییە لە هەرێمی کوردستان، بڵاوکردنەوەی ئەم کتێبە ڕۆژنامەنووسییەش هەوڵی ئێمەیە بۆ ئەوەی ڕۆژنامەنووسان بەشێوەیەکی زانستییانە بتوانن وردبینی زانیارییەکان بکەن پێش ئەوەی بڵاوی بکەنەوە.

 

ئەمەش بزانە: سکووڵی ڕۆژنامەوانی ئاڤا یەکێکە لە دامەزراوەکانی گرووپی میدیایی ئاڤا، لە ئایندەیەکی نزیکدا ژمارەیەک ڕاهێنانی ڕۆژنامەوانی چڕ و پڕ لەسەرجەم شارەکانی کوردستان دەکاتەوە و چاپکردنی ڕێبەری ڕۆژنامەوانیش یەکێکی دیکە دەبێت لە کارەکانی سکووڵەکە.