پاسدارێك پێنج هاوەڵی خۆی دەكوژێت

ئاڤا دیجیتاڵ

 سەربازێکی نێو سووپای پاسدارانی ئێران لە کرمان، لە نێو سەربازگەكەیدا تەقەی کردووە و لانیکەم پێنج لە هاوڕێکانی خۆی کوشتووە و دواتر هەڵاتووە.

چیرۆکە سەرەکییەکە: ئەمیر غولام عەلییان، سەرتیپی سووپای ئێران، بە میدیای ئێرانیی ڕاگەیاند "کاتژمێر 4:35ی ئێوارەی ڕۆژی یەکشەممە سەربازێک لە کاتی پاسەوانیی پێگەیەکی یەکەکەی خۆیدا، چووەتە نێو خانەی تیمارگەی سەربازەکانەوە و تەقەی لە هاوەڵەکانی خۆی کردووە. 

 

 

غوڵام عەلییان گوتیشی "دیار نییە پاڵنەرەکەی ئەم سەربازە چی بووە".

 

ئەوەی پێویستە بیزانیت: ئەم ڕووداوە دەگمەنەی کرمان دوای هەڵکشانی نیگەرانییەکانی ئاسایش دێت پاش هێرشە کوشندەکەی داعش لە سەرەتای ئەمساڵدا.

لێدوانی فەرمی: "بەداخەوە، لە ئەنجامی ئەم تەقەکردنەدا پێنج لە هاوەڵەکانی ئەم سەربازە کوژران،  سەربازە تەقەکەرەکە لە ئۆردوگاکەی هەڵاتووە و هێزەکانیان لە هەوڵی دەستگیرکردنیدان". سەرتیپی سووپای ئێران وای گوت.

زانیاریی زیاتر: ڕۆژی سێی کانوونی دووەم، ئاپۆرایەک لە نزیک گۆڕی قاسم سلێمانی، فەرماندەی هێزی قودسی سوپای پاسدارانی کۆماری ئیسلامیی ئێران، لە شاری کرمان لە ئێران کۆ بوونەوە و یادی کوشتنەکەیان کردەوە، بەڵام بۆمبێکی خۆکوژیی داعش پێیاندا تەقییەوە و نزیکەی 90 کەس کوژران.