دوو كچە كوردی ئێزدی وتەی یەكێك لە هاوسەرەكانی بەغدادی ڕەتدەكەنەوە

ئاڤا نیوز 

 

کچە کەنیزەکە ئێزدیيەكان، قسەكانی هاوسەرەكەی بەغدادی و كچەكەی بەدرۆ دەخەنەوە و چۆنیەتی هەڵاتنیان ئاشکرا دەکەن.

 

چیرۆکی سەرەکی: ئەشواق حاجی حەمید، کچە کوردێکی ئێزدییە و یەکێک بووە لە کەنیزەکەکانی بەغدادی، بۆ ئەوەی  بتوانێت هەڵبێت، ڕۆڵی نەخۆشی گێڕاوە، دوای ئەوەی دەیگەیێننە نەخۆشخانەیەکی نەینەوا، لەوێ حەبێکی خەوتن دەدزێت، دواتر دەیخاتە ناو خواردن بۆ ئەندامانی ڕێکخراوەکە و هەر کە دەخەون،  ڕادەکات.

زانیاریی زیاتر: ئەشواق حاجی حەمید، کچێکی کوردی ئێزدییە، خۆی و خوشکە نۆ  ساڵانەکەی لەلایەن داعشەوە ڕفێنراون. ئەشواق قسەکانی هاوسەری یەکەم و دووەمی بەغدادی بەدرۆخستەوە، کە لە چاوپێکەوتنەکانی ڕابردوو باسیان لەوە کردبوو بە باشی مامەڵە لەگەڵ کچە ئێزدییەکان کراوە و گوتی "هاوسەری یەکەمی بەغدادی ئاگاداری فرۆشتنی کچەکان بوو".

بەغدادی دەستدرێژی سێکسی کردووەتە سەر ژنانی ئێزدی

ئەشواق باسی ئەوە دەکات بەغدادی دەستدرێژی سێکسی کردووەتە سەر ژنانی ئێزدی و دواتر فرۆشتوونی. باسی ئەوەش دەکات هاوسەرەکەی بەغدادی  لێی داوە و خراپ مامەڵەی لەگەڵ کردووە.

40 هەزار دۆلار بۆ فیدیەی ئازادکردن

سوعاد یەکێکی دیکەیە لە کەنیزەکە بارمتەکانی ماڵی بەغدادی، ئەوەی ئاشکرا کرد کە خێزانەکەی ناچاربووە 40 هەزار دۆلار فیدیە بدەن بۆ ئازادکردنی.

باوکێک 220 هەزار دۆلار بۆ ئازادکردنی دوو کچی دەداتە داعش

حاجی حەمید تەعلۆ، باوکی دوو لەو کچە ئێزدییانەیە کە تەمەنیان 10 ساڵ بووە و داعش ڕفاندوونی، دەڵێت "لە بەرنامەکەی هاوسەری بەغدادییەوە زانیم  یەکێک لە کچەکانم لە ماڵی ئەوان بووە". 

تەعلۆ ناچار بووە 220 هەزار دۆلار بۆ ئازادکردنی خێزانەکەی لەڕێگەی قاچاخچی و نێوەندگیری لە نووسینگەکانی ڕزگارکردنی بارمتەکان لە دهۆک بدات.

ڕۆژی 26-10-2019، ئەبوبەکر بەغدادي لە ئۆپەراسیۆنێکی تایبەتی هێزەکانی ئەمریکا لە پارێزگای ئیدلیب لە باکووری ڕۆژئاوای سووریا کوژرا.