سەرۆکایەتی و ئەنجوومەنی وەزیران: هەرێمی کوردستان بۆ هەڵبژاردن ئامادەیە

ئاڤا دیجیتاڵ 

 

سەرۆکایەتی و ئەنجوومەنی وەزیرانی هەرێمی کوردستان ئامادەیی خۆیان بۆ دابینکردنی پێداویستییەکانی هەرچی زوو بەڕێوەچوونی پەرلەمانی کوردستان دووپات کردەوە. 

 

چیرۆكە سەرەكییەكە: ڕۆژی سێشه‌ممه‌ 16/1/2024‌ سه‌رۆكایه‌تیی هه‌رێم و حكوومه‌تی هه‌رێمی كوردستان، به‌ مه‌به‌ستی تاوتوێكردن و دیاریكردنی نه‌خشه‌ڕێگه‌یه‌ك بۆ ئه‌نجامدانی هه‌ڵبژاردنی په‌رله‌مانی كوردستان، له‌ سه‌رۆكایه‌تیی هه‌رێمی کوردستان له‌گه‌ڵ كۆمسیۆنی باڵای سه‌ربه‌خۆی هه‌ڵبژاردنه‌كانی عێراق كۆبوونه‌وه‌.

بابەتی ستراتیژی: له‌ كۆبوونه‌وه‌كه‌دا خشته‌یه‌كی كاركردن و پێداویستییه‌كان بۆ ئه‌نجامدانی هه‌ڵبژاردنی په‌رله‌مانی كوردستان گفتوگۆی له‌باره‌وه‌ كرا و سه‌رۆكایه‌تیی هه‌رێم و ئه‌نجومه‌نی وه‌زیران ئاماده‌ییی خۆیان بۆ دابینكردنی پێدویستییه‌كان نیشان دا و هه‌رچی زوو ئه‌نجامدانی هه‌ڵبژاردنی په‌رله‌مانی كوردستانیان دووپات كرده‌وه‌.

لەلایەكی دیكەوە: شاندی كۆمسیۆن سوپاسی ئاماده‌یی هه‌رێمی كوردستانیان كرد بۆ سه‌رخستنی هه‌ڵبژاردن و دووپاتیان كرده‌وه‌ كه‌ به‌پێی خشته‌یه‌ك كه‌ له‌گه‌ڵ واده‌ یاساییه‌كان بگونجێت، ئاماده‌كاری بۆ ئه‌نجامادنی هه‌ڵبژاردنی په‌رله‌مانی كوردستان ده‌که‌ن.

بۆچی گرنگە: دوای بڕیاری دادگەی فیدڕاڵی عێراق كە درێژكردنەوەی تەمەنی خولی پێنجەمی پەرلەمانی كوردستانی    بە" نادەستووری و نایاسایی" ناوبرد، دوو جار رۆژی هەڵبژاردنی پەرلەمانی كوردستان دیاریكراوە، بەڵام هەڵبژاردن نەكراوە، بەوەش بۆشایی یاسایی لەهەرێمی كوردستان دروستبووە.

لێدوانی فەرمی: پێشتر دڵشاد شەهاب، گوتەبێژی سەرۆكایەتیی هەرێمی كوردستان  بە ئاڤا میدیای گوت:  تاوتوێی ئەوە دەكەین چەندێك كات پێویستە بۆ كۆمسیۆنی باڵای سەربەخۆی هەڵبژاردنەكانی عێراق تا بتوانێت هەڵبژاردنی پەرلەمانی كوردستان ئەنجام بدات، ئێمە حەزدەكەین بەزووترین كات هەڵبژاردن بەڕێوەبچێت".

" دوایینجار سەرۆكایەتی هەرێمی كوردستان ڕۆژی 25 ی شوباتی 2024 ی بۆ هەڵبژاردنی خولی شەشەمی پەرلەمانی كوردستان دیاریكرد، بەڵام كۆمسیۆن بە نامەیەك ئاگاداری كردینەوە كە ناتوانن لەوكاتەدا هەڵبژاردن ئەنجام بدەن ". گوتەبێژی سەرۆكایەتی هەرێمی كوردستان وادەڵێت.

باكگراوند: رۆژی سێشەممە 30-5-2023 دادگەی فیدراڵی كۆتایی بە خولی پێنجەمی پەرلەمانی كوردستانی  هێنا، كە پەرلەمان لە رۆژی 09-10-2022 تاوەكو 31-12-2023 تەمەنی خۆی درێژكردبووەوە، لەكاتێكدا 6-11-2022 خولەكە كۆتایی دەهات.

دادگەی باڵای فیدراڵی لە 21ـی كانوونی دووەمی 2024، دانیشتنێكی دیكە دەكات بۆ تاوتوێكردنی سكاڵایەك كە لە دژی یاسای هەڵبژاردنی پەرلەمانی كوردستان پێشكەش بە دادگەكە كراوە.