دژی هێرشە مووشەکییەکانی ئێران لە هەولێر خۆپیشاندان بەڕێوەچوو

 

ئاڤا دیجیتاڵ

سەدان هاونیشتمانی لەبەردەم ئۆفیسی نەتەوەیەکگرتووەکان لە هەولێر دژی هێرشە مووشەکییەکانی ئێران بۆ سەر هەولێر خۆپێشاندان دەکەن. 

 

بۆچی گرنگە: یەکێک لە ئامانجەکانی نەتەوەیەکگرتووەکان پاراستنی ئاشتی و ئاسایشی نێودەوڵەتی و پەرەپێدانی پەیوەندیی دۆستانەیە لەنێوان گەلان، بۆیە هاونیشتمانییان لەبەردەم ئۆفیسی نەتەوەیەکگرتووەکان لە هەولێر گردبوونەتەوە و دەیانەوێت لە ڕێگەی ئەو ڕێکخراوەوە کۆمەڵگەی نێودەوڵەتی لە هێرش و دەستدرێژییەکان بۆ سەر هەرێمی کوردستان ئاگادار بکەنەوە، تاوەکو بتوانرێ ڕێگری لە هێرشە دووبارەبووەکانی سەر شارەکە بکرێت. 

 

چیرۆکی سەرەکی: درەنگانی شەوی ڕابردوو بە مووشەک هێرشکرایە سەر هەولێر، سوپای پاسدارانی ئێران بەرپرسیارێتیی هێرشەکەی لەئەستۆ گرت و ڕایگەیاند: 24 مووشەکیان هەڵداوە و 15ـی ئاراستەی هەولێر کراوە. 

 

ئەوەی ئێستا ڕوودەدات: سەدان هاونیشتمانییانی دانیشتووی هەولێر، دژی هێرشە مووشەکییەکەی شەوی ڕابردووی سوپای پاسدارانی ئێران بۆ سەر هەولێر، لەبەردەم بارەگای نەتەوەیەکگرتووەکان خۆپێشاندان دەکەن.

 

داواکاری: هاونیشتمانیان داوا لە نەتەوەیەکگرتووەکان دەکەن هەڵوێستیان دژی ئەم مووشەکبارانە هەبێت و چیدیکە خەڵکی سیڤیل نەکرێتە ئامانج.

 

باکگراوند: شەوی ڕابردوو 15-01-2024، سوپای پاسدارانی ئێران بە مووشەکی دوورمەودا هێرشی کردە سەر چەند ناوچەیەکی شاری هەولێر، بەگوێرەی نوێترین ئامار پێنج هاونیشتمانیی مەدەنی گیانیان لەدەستدا و شەشی دیکەش بریندارن، زیانی زۆریش بەر ماڵ و خانووی هاووڵاتییانی هەولێر و دەوروبەری کەوتووە.