دژەتیرۆری کوردستان: سێ درۆنی دیکەمان تێکشکاندن

ئاڤا دیجیتاڵ

دژەتیرۆری کوردستان ڕایگەیاند، سێ درۆنی بۆمبڕێژکراو کە ئاراستەی بنکەی سەربازیی هاوپەیمانیی نێودەوڵەتیی دژی داعش لە فڕۆکەخانەی نێودەوڵەتیی هەولێر کرابوون، تێکشکێنران. 

 

چیرۆکی سەرەکی: کاتژمێر: 05:05 خولەکی بەرەبەیانی ئەمڕۆ سێشەممە 16-01-2024 سێ درۆنی بۆمبڕێژکراو کە ئاراستەی بنکەی سەربازیی هاوپەیمانیی نێودەوڵەتیی دژی داعش لە فڕۆکەخانەی نێودەوڵەتیی هەولێر کرابوون، تێکشکێنران و خرانە خوارەوە.

 

ئەوەی پێویستە بیزانیت: درەنگانی شەوی ڕابردوو لەلایەن سوپای پاسدارانی ئێران بە مووشەک هێرشکرایە سەر هەولێر، سوپای پاسدارانی ئێران بەرپرسیارێتیی هێرشەکەی لەئەستۆ گرت و ڕایگەیاند: بە 24 مووشەکی بالیستیکی هێرشمان کردە سەر هەولێر. 

 

چارەسەرەکان: سەرۆکوەزیران بارزانی بەرەبەیانی ئەمڕۆ هێرشەکانی سەر هەولێری شەرمەزار کرد و ڕایگەیاند: لە ڕۆژانی داهاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبین لەپێناو کۆتاییهێنان بەم هێرشە دڕندانانەی دەکرێنە سەر خەڵکی بێ تاوانی کوردستان.

 

باکگراوند: لە حەوتی ئۆكتۆبەری ساڵی ڕابردووەوە شەڕی نێوان ئیسرائیل و گرووپی چەکداری حەماس دەستیپێكرد، لەوکاتەوە گرووپە چەکدارەکانی سەر بە ئێران نزیكەی 130 هێرشیان لەعێراق و سووریا کردووەتە سەر بارەگاکانی ئەمریکا.