پلاندانانی عێراق: هەر تاکێک داهاتی لە 137 هەزار دینار زیاتربێت بە هەژار دانانرێت

ئاڤا نیوز

 

وەزارەتی پلاندانانی عێراق "ستراتیژییەتی ڕووبەڕووبوونەوەی هەژاریی" ڕادەگەیێنێت و دەڵێت، هەر تاکێک داهاتی لە 137 هەزار دینار زیاتربێت بە هەژار دانانرێت.

 

ئەوەی پێویستە بیزانیت: بەگوێرەی کۆتا ئاماری سەرژمێریی دانیشتووان کە ساڵی ڕابردوو ئەنجام درا، ئاستی هەژاریی لە عێراق 17.5%ـیە لەکاتێکدا پێشتر 20.5% بووە. بەرپرسانی حکومەت دەڵێن، ئەوە نیشانەی ئەوەیە حکومەت لە دابەزاندنی ئاستی هەژاریی سەرکەوتوو بووە.

 

لێدوانی فەرمی: عەبدولزەهرە هینداوی، وتەبێژی وەزارەتی پلاندانانی عێراق ڕایگەیاند، ناوەڕاستی ئەم مانگە وەزارەتەکەیان "ستراتیژییەتی ڕووبەڕووبوونەوەی هەژاریی" ڕادەگەیێنێت، ئامانجیش لەم پڕۆژەیە ئەوەیە تا ساڵی 2029 ڕێژەی هەژاریی زیاتر دابەزێنن و دۆخی ژیانی هاووڵاتییان باشتر بکەن.

 

زانیاریی زیاتر: لە عێراق هەر کەسێک داهاتی لە 137 هەزار دینار کەمتربێت مانای وایە لە خوار هێڵی هەژارییە، تێکڕای خێزانیش لە عێراق پێنج بۆ شەش کەسە و هەر خێزانێکیش ئەگەر داهاتی لە 637 هەزار دینار کەمتر بێت، لەناو هێڵی هەژاریدا هەژمار دەکرێت.