پۆلیسی بەریتانیا: کۆچبەران پارە سپی دەکەنەوە

ئاڤا نیوز

پۆلیسی بەریتانیا ئۆپەراسیۆنێکیان بۆسەر سەرتاشخانە و دوکانەکانی فرۆشتنی ڤەیپ دەستپێکردووە، دەڵێن هاوکاریی باندە تاوانکارییەکان دەکەن.

چیرۆکی سەرەکی: پۆلیسی بەریتانیا لە هەڵمەتەکانیدا بۆسەر ئەو سەرتاشخانە و دوکانانەی گومانیان لێدەکرێت هاوکاری باندە تاوانکارییەکان بکەن دەستی بەسەر هەزاران پاوەندی بەریتانی و ڤەیپی (جگەرەی ئەلیکترۆنی) نایاساییدا گرتووە.

زانیاریی زیاتر: ئەفسەرە هەواڵگرییەکانی بەریتانیا دەڵێن، ژمارەی سەرتاشخانەکان بەراورد بە دە ساڵی ڕابردوو ژمارەیان دوو هێندە زیادیکردووە و ئەو دوکانانەی هەڵمەتەکە دەیانگرێتەوە پەیوەندییان بە فرۆشتنی جگەرە و ڤایپی نایاسایی و کۆچی نایاسایی و بازرگانیکردن بە ماددە هۆشبەرەکانەوە هەیە.

ڕاگەیێنراوی فەرمی: دەزگای تاوانی نیشتمانی بەریتانیا ڕایگەیاند، باندە تاوانکارییەکان لە ڕێگەی سەرتاشخانە و ئەو دوکانانەی بە نایاسایی جگەرە و ڤەیپ دەفرۆشن پڕۆسەی سپیکردنەوەی پارە ئەنجام دەدەن.

پۆلیس زنجیرەیەک دوکانی کردووەتە ئامانج کە گومانیان لەسەرە سەر بە بەرەیەک بن بۆ چالاکی نایاسایی کۆچبەرانی کورد و عێراقی و ئێرانی و بەشێک لە کارمەندەکانیش بە شێوەیەکی نایاسایی لە بەریتانیا کاردەکەن.

35 کەس دەستگیرکراون، هەروەها لێپرسینەوە لەگەڵ 55 گومانلێکراوی کۆچبەری نایاسایی کراوە.

ئەمەش بزانە: بەپێی ئامارەکانی دەزگای تاوانی نیشتمانی بەریتانیا مەزەندە دەکرێت ساڵانە 12 ملیار پاوەند لە پارەی نایاسایی لە بەریتانیا سپی بکرێتەوە، بەشێکی لە ڕێگەی باندە تاوانکارییەکانەوە ئەنجام دەدرێت.