لەڕەمەزاندا زیاتر لە 122 ملیۆن کەس سەردانی سعودییەیان کردووە

ئاڤا نیوز

مانگی ڕەمەزانی ئەمساڵ زیاتر لە 122 ملیۆن کەس سەردانی شوێنە پیرۆزەکانی سعودییەیان کردووە، لەو ژمارەیەش زیاتر لە 16 ملیۆنیان عەمرەیان کردووە.

ئەوەی پێویستە بیزانیت: محەممەد بن سەلمان، شازادەی جێنشینی سعودییە لە ساڵی 2016ەوە ڕوانگەی ئابووری و بازرگانی و گەشتیاریی وڵاتەکەی بۆ ساڵی 2030 ڕاگەیاندووە، بەوتەی وەزیری ئابووری سعوودییەش ئێستا کەرتی نانەوتی وڵاتەکە 52%ی داهاتی دەوڵەت پێکدەهێنێت کە گەشتیاریی ئاینییش پایەیەکی سەرەکیی کەرتی نانەوتی ئەو وڵاتەیە.

ڕاگەیێنراوی فەرمی: دەستەی گشتی هەردوو مزگەوتی حەرەمی مەککە و مزگەوتی پێغەمبەر (د.خ) بڵاویکردەوە، لە 29 ڕۆژی مانگی ڕەمەزانی ئەمساڵدا، 122 ملیۆن و 286 هەزار و 286 عەمرەکار و سەردانیکار سەردانی شوێنە ئاینییە پیرۆزەکانی وڵاتەکەیان کردووە و پەرستشە ئاینییەکانیان لە کەشێکی ئارام و پڕ لە ئیماندا ئەنجامداوە.

ئەمەش بزانە: بەگوێرەی ئامارەکە لەو ماوەیەدا 16 ملیۆن و 558 هەزار و 241 کەس بەمەبەستی ئەنجامدانی عەمرە سەردانی مزگەوتی حەرەمی مەککە و مزگەوتی پێغەمبەریان کردووە.

زانیاریی زیاتر: هاوکات 75 ملیۆن و 154 هەزار و 543 نوێژ خوێن سەردانی مزگەوتی حەرەمی مەککەیان کردووە، 30 ملیۆن و 154 هەزار و 543 نوێژ خوێنیش سەردانی مزگەوتی پێغەمبەریان لە شاری مەدینە کردووە.