چوارچێوەی هەماهەنگی: دانیشتنی داهاتووی پەرلەمان بە سەرکەوتوویی بەڕێوەدەچێت

ئاڤا نیوز

بەهۆی ئەوەی یاسای حەشدی شەعبی خراوەتە کارنامەی دانیشتنی پەرلەمان، پەرلەمانتارێکی چوارچێوەی هەماهەنگی دووپاتی دەکاتەوە؛ دانیشتنەکە سەرکەتووانە بەڕێوەدەچێت و خوێندنەوەی یەکەم بۆ یاسەکە دەکرێت.

وێنە گەورەکە: بەهۆی ململانێی سیاسی نێوان چەند هێزێکی سیاسی شیعە، سەبارەت بە یاسای حه‌شدی شه‌عبی ماوەی زیاتر لە شەش هەفتەیە پەرلەمان نەیتوانیوە کۆببێتەوە، ناکۆکییەکانی ئەو هێزە لەمبارەیەوە چارەسەرکراوە و یاسای حەشدی شەعبی خراوەتە کارنامەی دانیشتنی داهاتووی پەرلەمان.

لێدوانی فەرمی: وەعد قەدۆ، پەرلەمانتاری هاوپەیمانیی چوارچێوەی هەماهەنگی بە ئاڤا میدیای ڕاگەیاند: دانیشتنی ڕۆژی دووشەممەی پەرلەمان بە سەرکەوتوویی  بەڕێوەدەچێت، دوای ئەوەی یاسای حەشدی شەعبی خرایە کارنامەی دانیشتنەکە، خوێندنی یەکەم بۆ یاساکە دەکرێت.

قەدۆ دووپاتیشی کردەوە؛ پەرلەمانتاران بایکۆتی دانیشتنەکانی پەرلەمان دەشکێنن، کار دەکەین بە زووترین کات لە کۆبوونەوەکانی دیکەی پەرلەمان یاساکە پەسەند بکەین، هێزە سیاسییەکانی چوارچێوەی هەماهەنگی لەسەر چارەسەرکردنی ناکۆکییەکانی سەبارەت بە یاساکە ڕێککەوتوون.

زانیاریی زیاتر: بڕیارە کاتژمێر 8ـی ئێوارەی ڕۆژی دووشەممە 24ـی ئادار پەرلەمانی عێراق کۆببێتەوە، دەنگ لەسەر چەند پرۆژە یاسایەک دەدات و خوێندنەوەی یەکەمیش بۆ چەند پرۆژە یاسایەکی دیکەش دەکات، دیارترینیان، خوێندنەوەی یەکەم بۆ پرۆژە یاسای دەستەی حەشدی شەعبی.