لە کوردستان نزیکەی 12%ی سەرۆک خێزانەکان ئافرەتن

ئاڤا نیوز

ئاڤا ئامارێكی جیاوازی كەوتووەتە دەست، دەردەكەوێت نزیكەی 12%ـی خێزانە ئاساییەكانی هەرێمی كوردستان، ئافرەتان سەرۆكی خێزانن.

وێنە گەورەكە: نیشاندەرە گشتییەكانی هەرێمی كوردستان لە سەرژمێریی گشتیی دانیشتووان ئەوە دەردەخەن؛ ڕێژەی خێزانە ئاساییەكان كە پیاو سەرۆك خێزانە، 88.11% ـەیە، هەرچی ڕێژەی ئەو خێزانانەیە كە ئافرەت سەرۆك خێزانە، 11.89% ـە.

لێدوانی فەرمی: دڵزار حەمەساڵح، سەرۆكی دەستەی ئاماری هەولێر تایبەت بە ئاڤا ڕایگەیاند، پێوەری دیاریكردنی سەرۆك خێزان لە نیشاندەرە گشتییەكانی سەرژمێری، بەپێی لە ئەستۆگرتنی بژێوییە لەلایەن خانمانەوە جا ئەو ئافرەتە بێوەژن بێت یاخود كچی گەورەی ماڵەوە بێت كە شووی نەكردووە و بژێوی خوشك و براكانی لە ئەستۆ دایە.

ژمارەكان وادەڵێن: ڕێژەی سەرۆكایەتیكردنی خێزان لەلایەن ئافرەتانەوە لە پارێزگایەك بۆ پارێزگایەكی دیكەی هەرێمی كوردستان جیاوازە، ڕێژەكە لە پارێزگای سلێمانی لەسەرجەم پارێزگاكانی دیكە بەرزترە و دەگاتە 13.18%ـە، هەرچی پارێزگای هەولێرە، ڕێژەكە 11.93%ـە و لە دهۆك كەمترینە كە 9.03%ـە.