وەزارەتی دەرەوەی ئەمریکا بۆ ئاڤا: حەماس بەرپرسیارێتی دەستپێکردنی جەنگی لە ئەستۆیە

 

ئاڤا نیوز

وەزارەتی دەرەوەی ئەمریکا بە ئاڤای ڕاگەیاند، حەماس بەرپرسیارێتی تەواوەتی دەستپێکردنەوەی شەڕی لە ئەستۆیە.  

وێنە گەورەکە: دوای 57 ڕۆژ لە ڕاگرتنی شەڕ، شەوی 18ـی ئەم مانگە، ئیسرائیل دەستی بە هێرشەکانی بۆسەر کەرتی غەززە کردەوە، هێرشەکان بە جۆرێک بوون لە چەند کاتژمێرێکی کەمدا سەدان هاووڵاتی کوژراون و برینداربوون.

لێدوانی فەرمی: لە وەڵامی پرسیاری ئاڤا سەبارەت بە هێرشەکەی ئەمدواییەی ئیسرائیل بۆ سەر غەززە، تامی برووس، وتەبێژی وەزارەتی دەرەوەی ئەمریکا ڕایگەیاند، حەماس بەرپرسیارێتی تەواوەتی دەستپێکردنەوەی شەڕی لە ئەستۆیە. دەکرا هیچ کەسێک گیانلەدەست نەدات ئەگەر حەماس پێشنیاری ستیڤ ویتکۆف نوێنەری تایبەتی سەرۆک ترەمپی قبووڵبکردایە کە ڕۆژی چوارشەممەی ڕابردوو پێشنیازی کردووە.

حەماس ئەو ڕێککەوتنە دوادەخات کە لەبەردەمماندایە و فەلەستینییەکان ناچار دەکات تووشی لێکەوتەکانی ببن.

 

ئێمە بەردەوام دەبین لە پاڵپشتیکردنی ئیسرائیل و ئاشتی لە ناوچەکەدا.