سەرۆک بارزانی هاوکارییە بەردەوامەکانی کۆریای باشوور بەرزدەنرخێنێت

 

ئاڤا دیجیتاڵ

 

لە پێشوازی کونسوڵی نوێی کۆریای باشوور، سەرۆک بارزانی سوپاسی گەل و حکومەت و هێزی زەیتوونی ئەو وڵاتەی کرد کە هاوکاریی بەردەوامی هەرێمی کوردستانیان کردووە، هیواخوازیش بوو پەیوەندییەکان پەرەیان پێبدرێت و زیاتر پێشبخرێن.

 

بۆچی گرنگە: کۆریای باشوور و هەرێمی کوردستان لەدوای ساڵی 2003 ەوە پەیوەندییەکی سیاسی و ئابووری و کولتووری تایبەتیان هەیە و ئەو وڵاتە کونسوڵخانەی گشتی لە هەولێر هەیە، ئێستاش هەردوولا کار بۆ فراوانکردنی پەیوەندییەکان دەکەن.

 

بابەتە ستراتیژییەکان: رۆژی دووشەممە 15-1-2024، سەرۆک بارزانی لە سەڵاحەددین  پێشوازی لە سینگچۆل لیم، کونسوڵی گشتیی نوێی کۆریای باشوور لە هەولێر کرد، بابەتە سەرەکییەکانی کۆبوونەوەکە بریتیبوون لە پەیوەندییە هەمەجۆرەکانی نێوان هەردوولا، بارودۆخی سیاسی و ڕووداوەکانی ئەمدواییانەی ناوچەکە بەگشتی گفتوگۆیان لەسەرکرا.

 

لێدوانە فەرمییەکان: سەرۆک بارزانی پیرۆزبایی دەستبەکاربوونی لە کونسوڵی گشتیی نوێی کۆریای باشوور لە هەولێر کردووە و هیوای سەرکەوتنی لە ئەرکەکەیدا بۆ خواستووە. بەپێی راگەیەنراوی کۆبوونەوەکە، لە دیدارەکەدا سەرۆک بارزانی سوپاس و پێزانینی خۆی بۆ گەل و حکومەتی کۆریای باشوور و هێزی زەیتوونی کۆریای باشوور دەربڕیوە کە هاوکاریی بەردەوامی  هەرێمی کوردستانیان کردووە و هیوای خواستووە پەیوەندییەکانی هەردوولا پەرەیان پێبدرێت و زیاتر پێشبخرێن.

 

لەلایەکی دیکەوە: کونسوڵی کۆریای باشوور دڵخۆشیی خۆی نیشانداوە کە وەک کونسوڵی وڵاتەکەی لە هەرێمی کوردستان دەستبەکاربووە و، پێزانینی بۆ رۆڵی کوردستانیان و هێزەکانی پێشمەرگەی کوردستان هەبووە، کە لەپێناو ئازادی و پاراستنی سەقامگیری و ئاسایش تێکۆشاون.

 

ئەوەی پێویستە بیزانیت: هەرێمی کوردستانی و کۆریای باشوور لە چەندین ڕووەوە پەیوەندییەکی تایبەتیان هەیە. لەدوای پرۆسەی ئازادی عێراق، کۆریای باشوور لە هەرێمی کوردستان ئامادەیی هەیە و ساڵانی 2003 - 2008 هێزی زەیتوون کە ژمارەیان سێ هەزار سەرباز بوو لە هەرێمی کوردستان کاری ئاوەدانکردنەوەیان دەکرد. بۆ زیاتر پتەوکردنی پەیوەندییە سیاسی و بازرگانی و کولتوورییەکانیش، وڵاتی کۆریای باشوور لە ساڵی 2017 بڕیاری دا ئاستی نوێنەرایەتیی وڵاتەکەی لە نوێنەری کونسوڵخانە بکاتە کونسوڵخانەی گشتی.