موقتەدا سەدر: لەکاتی دەستبەتاڵیدا تیکتۆک بەکاری دەهێنم

ئاڤا نیوز 

 

ڕێبەری ڕەوتی نیشتمانیی شیعە لە وەڵامی پرسیاری یەکێک لە شوێنکەوتووانی سەبارەت بە بەکارهێنانی ئەپڵیکەیشنی تیکتۆک دەڵێت، لە کاتی دەستبەتاڵیدا، بەکاری دەهێنم.

 

چیرۆکی سەرەکی: دوای ئەوەی موقتەدا سەدر، ڕێبەری ڕەوتی نیشتمانیی شیعە لە کاری سیاسی دوورکەوتەوە، ئێستا لە نووسینگەکەی خۆی لەپارێزگای نەجەف بەردەوام وەڵامی پرسیاری شوێنکەوتووان و لایەنگرانی لە "چوارچێوەی شەریعەت و یاسا" دەداتەوە. 

 

بڵاوکراوەی فەرمی: بەگوێرەی بڵاوکراوەیەک کە واژۆی موقتەدا سەدر، ڕێبەری ڕەوتی نیشتمانیی شیعەی لەسەرە، لە وەڵامی پرسیارێک سەبارەت بە بەکارهێنانی ئەپڵیکەیشنی تیکتۆک، لەکاتێکدا کاریگەریی نەرێنی لەسەر گەنجانی عێراق و دوورخستنەوەیان لە بەهاکانی ئیسلام هەیە، سەدر دەڵێت: "بەکارهێنانی ئاساییە، بەڵام نابێت بۆکاری نەشیاو و خراپ بەکاری بهێنین".

-  من خۆم تیکتۆک بەکاردەهێنم بەڵام بەشێوەیەک کە خوای گەورە ڕازی بکات و سوودی بۆ کۆمەڵگا هەبێت، بەبێ ئەوەی ئاڵوودەی بەکارهێنان و گەڕانبم بەناویدا.
 
ئەمەش بزانە:  چەند ساڵێکە بەبۆنەی مانگی ڕەمەزانی پیرۆزەوە، چەندین درامای عێراقی لەکەناڵە عێراقییەکان پەخش دەکرێت، کە زۆربەیان بەرهەمی خودی کەناڵەکانن و سەدر ڕایگەیاندووە کاتی خۆتان بە سەیرکردنیانەوە مەکوژن.