ئەردۆغان: پاڵپشتییەکانی ڕۆژئاوا بۆ ئیسرائیل ڕازیبوونە بە کۆمەڵکوژییەکانی فەلەستین

ئاڤا نیوز

 

مەحموود عەباس، سەرۆکی فەڵەستین لە تورکیا و لەلایەن ئەردۆغانەوە پێشوازی لێکرا، هەردوولا جەختیان لەسەر ڕاگرتنی هێرشەکان و ڕاگەیاندنی ئاگربەست لە غەززە کردەوە.

 

بۆچی گرنگە؟ ئەم سەردانە لەم کاتەدا کە هێشتا جەنگی ئیسرائیل و غەززە بەردەوامە، دووپاتکردنەوەی پاڵپشتییەکانی تورکیایە بۆ فەلەستین؛ ماوەیەک پێش ئێستاش تورکیا هاوکاری مرۆیی گەیاندە دانیشتووانی ‌غەززە و ژمارەیەک برینداریش بۆ چارەسەرکردن هێنراونەتە نەخۆشخانەکانی تورکیا.

 

لێدوانی فەرمی: لە کۆنگرەیەکی ڕۆژنامەوانیدا ئەردۆغان ڕایگەیاند: "151 رۆژە شایەتی بینینی گەورەترین تاوانی سەدە دەبین، پاڵپستییەکانی رۆژئاوا بۆ حکومەتەکەی نەتەنیاهۆ ڕازیبوونە بە کۆمەڵکوژی خەڵکی فەلەستین".

 

زانیاریی زیاتر: بەهۆی هێرشەکانی ئیسرائیلەوە نزیکەی 32 هەزار هاووڵاتی لە غەززە گیانیان لەدەستداوە و زیاتر لە 72 هەزار کەسیش بریندار بوونە؛ ئێستا دوو ملیۆن هاووڵاتی ئاوارە بوونە و دەستیان بە پێداویستی ڕۆژانە ناگات.