ئاژانسی وزەی ئەتۆم: ئێران پیتاندنی یۆرانیۆمی خێراتر کردووە

ئاڤا نیوز

بە گوێرەی ڕاپۆرتێکی ئاژانسی نێودەوڵەتیی وزەی ئەتۆم (IAEA) لە ماوەی چەند مانگی ڕابردوودا، ئێران پیتاندنی یۆرانیۆمی بە ڕێژەیەکی زۆر زیاد کردووە.

زانیاریی بەدەستهاتوو: ڕاپۆرتەکە بە شێوەیەکی نهێنی ئامادەکراوە و ئاژانسی فڕانس پرێس توانیویەتی دەستی پێ بگات و بەشێک لە زانیارییەکانی بڵاو بکاتەوە.

زانیاریی زیاتر: لە ڕاپۆرتەکەی ئاژانسی نێودەوڵەتیی وزەی ئەتۆم، کە چوار مانگ جارێک بڵاو دەکرێتەوە، ئاماژە بەوە دراوە کە ئێران تاوەکو 8-2-2025 بڕی 274.8 کیلۆ یۆرانیمی پیتێنراو بە ڕێژەی 60٪ هەبووە، ئەمە لە کاتێکدایە کە ئەم ڕێژەیە لە مانگی نۆڤەمبەردا 92.5 کیلۆگرام بووە. ڕاپۆرتەکە دەڵێت ئەمە مایەی ''نیگەرانیی جیدییە'' چونکە ئێران تەنیا دەوڵەتی نائەتۆمییە کە پیتاندنی یۆرانیۆم تا 60٪ بەرز دەکاتەوە. 

لەلایەکی دیکەوە: مانگی دیسێمبەر ئێران ڕایگەیاند پلانی هەیە ئاستی بەرهەمهێنانی یۆرانیۆمی پیتێنراو نە ڕێژەی 60٪ زیاد بکات، بەمەش نزیک دەکەوێتەوە لە یۆرانیۆمی پیتێنراو بە ڕێژەی 90٪ کە بە بەرهەمهێنانی بۆمبی ئەتۆمی بەکار دەبرێت.