لە ساڵێکدا 975 کەس لە ئێران لەسێدارە دراون

ئاڤا نیوز

هەردوو 'ڕێکخراوی مافی مرۆڤی ئێران' کە بارەگای سەرەکی لە نەرویجە و ڕێکخرای فەرەنسیی 'هەمووان لە دژی سزای لە سێدارەدان' ڕایانگەیاند، لە ساڵی 2024ـدا لە ئێران لانیکەم 975 کەس لەسێدارە دراون. 

ئەوەی لەوبارەیەوە دەگوترێت: لەو ژمارەیە 4 کەسیان لە شوێنە گشتییەکان و بە بەرچاوی خەڵکەوە لە سێدارە دراون و 31 کەسیشیان ژن بوون کە لە 17 ساڵی ڕابروودا ئەمە یەکەمجار لە ساڵێکدا ئەو ژمارە زۆرە لە ژن لەسێدارە بدرێن. 

ڕاگەیێنراوی فەرمی: بە گوێرەی ڕاگەیێنراوی ڕێکخراوەکان ئەمە بەرزترین ئاستی لەسێدارەدانە لە وڵاتە لەوەتەی ساڵی 2008ـەوە کە ڕێکخراوی مافی مرۆڤی ئێران دامەزراوە و دەستی بە تۆمارکردنی لەسێدارەدانەکان کردووە. 

ئەوەی پێویستە بیزانیت: ئەمە لە کاتێکدایە کە ساڵێک پێشتر، واتە ساڵی 2023ـدا 834 کەس لەسێدارە دراوە و لە ساڵی 2024ـدا ئەم ژمارەیە بە ڕێژەی 17% زیادی کردووە.

ئەمەش بزانە: لە ماوەی ساڵی 2025ـیشدا تا ئیستا لانیکەم 121 کەس لە ئێران لەسێدارە دراون.

زانیاریی زیاتر: بە گوێرەی یاساکانی ئێران، تاوانەکانی وەک کوشتن، دەستدرێژیی تووندوتیژی و تاوانەکانی پەیوەست بە ماددەی هۆشبەر سزای لەسێدارەدانیان لەسەرە.