ئایە قۆناغی یەکەمی ڕێککەوتنی ئاگربەستی غەززە کۆتایی هاتووە؟

ئاڤا نیوز

دوێنێ شەممە، گەڕی شەشەمی قۆناغی یەکەمی ڕێککەوتنی غەززە کۆتایی هات و  حەماس سێ بارمتەی ئیسرائیلی بەرامبەر 369 زیندانی فەڵەستینی ئازاد کرد.

 

وێنە گەورەکە: ڕۆژی 19-1-2025 ڕێککەوتنی ئاگربەستی غەززە چووە بواری جێبەجێکردنەوە، تا ئێستا هەردوولا شەش گەڕی ئاڵوگۆڕکردنی بارمتەکانیان ئەنجامداوە، تا ئێستا 19 بارمتەی ئیسرائیلی و پێنج تایلەندی ئازادکراون، لە بەرامبەردا زیاتر لە 1100 بەندکراوی فەلەستینی لە زیندانەکانی ئیسرائیلدا ئازاد کراون.

 

پێدراوە ڕاستەکان: بڕیارە 33 بارمتەی دیکەی ئیسرائیلی ئازاد بکرێت لە ناویاندا هەشتیان کوژراون و تەرمەکانیان ڕادەست دەکرێتەوە، ئیسرائیلیش 1900 فەڵەستینی دیکە ئازاد دەکات و بەم شێوەیە تەنیا 73 بارمتەی ئیسرائیلی لە غەززە دەمێننەوە.

 

زانیاریی زیاتر: دانووستاندنەکان بۆ قۆناغی دووەم دەست پێدەکەنەوە و لەو قۆناغەدا دەبێت سەرجەم بارمتەکان ئازاد بکرێن و سوپای ئیسرائیل بە تەواوی لە کەرتی غەززە بکشێتەوە، هاوکات لە قۆناغی سێیەم و کۆتایی لەژێر چاودێری میسر و قەتەر و نەتەوە یەکگرتووەکاندا، دەست بە قۆناغی ئاوەدانکردنەوەی کەرتی غەززە دەکرێت، بەڵام ئەم قۆناغە مشتومڕی بەدوای خۆیدا هێناوە چونکە دۆناڵد ترەمپ، پێشنیازی کردووە خەڵکی غەززە بۆ میسر و ئوردن بگوازرێنەوە و ئەو کەرتە لەلایەن ئەمریکاوە بەڕێوەببرێت.

 

ئەمەش بزانە: هەریەکە لە میسر، ئوردن و سەرجەم وڵاتانی دیکە ئەم پێشنیازەیان ڕەتکردەوە و داوای ڕێزگرتن لە سەروەری خاکی فەڵەسین دەکەن.