ئاڤا میدیا خاوەنی پەیجێک ئاشکرا دەکات کە 40 ساڵە فێل لە خەڵک دەکات

ئاڤا نیوز

لە پەیجێکی ئینستاگرام بە ناوی (شێخ لوقمان) بانگەشە بۆ کاری سیحر و نووشتە دەکات و گوایە بە زەمانەت کارەکان دەکات. لەسەر داوای چەند کەسێک ئاڤا میدیا بەدواداچوون بۆ بابەتەکە دەکات و خاوەنی پەیجەکە دەدۆزێتەوە.

ئەوی پێویستە بیزانیت: پەیجەکەی شێخ لوقمان زۆر گشتی نییە، تەنیا 544 کەس فۆڵەویان کردووە، خۆشی حەوت هەزار و 531 کەسی فۆڵەو کردووە، هاوکات زۆرترین ئەو کەسانەی کە شێخ فۆڵەوی کردوون، ئینیستاگرامی ژنان و کچانە و خۆی ئادی بۆ ناردوون.

چیرۆکی سەرەکی: کارمەندێکی ئاڤا میدیا پەیوەندی بە خاوەنی پەیجەکە کرد، کەسێک وەڵامی دایەوە و خۆی وەک شێخ لوقمان ناساند، ئەو کارمەندە داوای لێ کردووە یارمەتی بدات لە چارەسەرکردنی کێشەیەک، ئەویش داوای لێ دەکات کێشەکەی بە نامەیەکی دەنگی بنێرێت و پێی دەڵێت: "هەموو کێشەیەک چارەسەر دەکەم".

گفتوگۆی ئاڤا و شێخ لوقمان

- شتەکەت بۆ دەکەم کە لە ماوەی 15ڕۆژ ئەو کچە مارە بکەی، هەروەها باوکی کچەکە خۆی بڵی وەرە مارەی بکە، بەڵام پێشەکی دەبێت شەش کارتی 100 هەزار دیناری ئاسیا یان کۆڕەکم بۆ بنێری، لەگەڵ ناوی خۆت و کچەکە و باوکی کچەکە، هەروەها ماڵیشتان لە کوێیە، بەڵام دەبێت ئاگادار بیت کاتێک کارتەکانت نارد، یەکسەر کاغەزی کارەتەکە بسووتێنی.

- کارمەندەکەی ئاڤا پێی دەڵێت: باشە چ زەمانێک هەیە ئەو ئیشە سەربگرێ؟
- شێخ دەڵێت: من ئەوە 40 دانە ساڵە ئەو کارە دەکەم 100% کارەکە سەردەگرێ و یەک سەعات دواناکەوێت.

- گەنجەکە بەردەوام دەبێ لەسەر قسەکانی و داوای زەمانەتی لێدەکات، شێخ لوقمان لێی تووڕە دەبێت و دەڵێت: ئەوە زەمان زەمانی چیتە، من سەدان خەڵکم بەیەک گەیاندووە، ئەگەر دەتەوێ ئەهلەن  وەسەهلەن، ئەگەر ناتەوێ ناتەوێ کاتم مەگرە و ئیشی خەڵکم زۆر لەبەردەستە.

شێخ لوقمان ئۆفەری هەیە

دوای ئەوەی شێخ بە کارمەندەکەی ئاڤا دەڵێت، ئەوە زەمان زەمانی چیتە، کارمەندەکەی ئاڤا بە شێخ دەڵێت، مادام زەمانەتی نییە، لێی گەڕێ، بەڵام شێخ وازی لێناهێنێت و ئیزنی نادات و ئۆفەرێکی دەداتێ و دەڵێ، "دەتوانم لەبەر خودا شتێکی دیکەت بۆ بکەم، ئێستا نیوەی پارەکە بنێرە، کاتێک کچەکەت مارە کرد نیوەکەی دی بنێرە، ئەوەش زەمانەتە"!.

لێدوانی فەرمی: لەم بارەیەوە ئاڤا میدیا لەگەڵ نەقیب سەرکەوت ئەحمەد، وتەبێژی پۆلیسی سلێمانی قسەی کرد، نەقیب سەرکەوت ڕایگەیاند:

- ئەو شێخە ماوەیەکی زۆرە لە سلێمانییە، بەڵام نە ساڵی ڕابردوو، نە ئەمساڵیش کەس داوای یاسایی لەسەری نەبووە، ئێمە لەسەر بنەمای داوای یاسایی مامەڵە لەگەڵ ئەو کەیسانە دەکەین.

- لەماوەی ئەمساڵدا چەند حاڵەتێکمان هەبووە خەڵک لەسەر سیحر و جادووکردن دەستگیرکراون.