‎هەڤاڵ ئیبراهیم لە ئاڤاوە باس لە كارە هونەرییەكانی دەكات

ئاڤا نیوز

هونەرمەند هەڤاڵ ئیبراهیم، لە چاوپێکەوتنێکدا لەگەڵ ئاڤا نیوز، باس لە کارە هونەرییەکانی دەکات و دەڵێت "فۆلکلۆری کوردی زۆر زەنگین و  جۆراوجۆرە".

ئاڤا نیوز: بەر لە هەر  شتێک دەمەوێت بپرسم جگە لە کاری هونەری سەرقاڵی چ کارێکی دیکەیت و لە کوێ ژیان دەکەیت؟

هەڤاڵ ئیبراهیم: ئێستا دانیشتووی وڵاتی ئەڵمانیام  و سەرقاڵم بە کاری هونەرییەوە.

ئاڤا نیوز: ‎جیلێکی نوێی هونەری ئێستا زۆر چالاکانە کار دەکەن، لایەنگر و دژبەریشیان هەیە تۆ وەک هەڤاڵ لە ئەدای هونەرییان رازیت؟

هەڤاڵ ئیبراهیم: بێگومان زۆر دەنگی باش هەیە و شایەنی پشتگیرین..

ئاڤا نیوز: ئەگەر هونەرمەند نەبوویتایە چی کارێک لە کەسایەتی هەڤاڵ ئیبراهیمەوە نزیک بوو؟

هەڤاڵ ئیبراهیم: نازانم چ کارێک لە کەسایەتی من دێت. بەڵام دەزانم هەر کارێک مرۆڤ بە دڵسۆزی بیکات تیایدا سەرکەوتوو دەبێت.

ئاڤا نیوز: ‎گۆرانی وەرە قوربان یەکێک بوو لە بەرهەمە تایبەتەکانی هەڤاڵ ئیبراهیم، پێشوازی خەڵک بۆ ئەو بەرهەمە چۆن بوو؟

هەڤاڵ ئیبراهیم: بۆ ئەو کاتە کارێکی باش بوو ، سەرەڕای نەبوونی کۆمپانیای باشی هونەری و ئامێری تەکنیکی لەو کاتەدا، بەڵام بوێری گڕو تینی من بۆ ئەوکارە وای کرد بەرهەمێکی باشی لێ دروست ببێت.

ئاڤا نیوز: ‎هونەر چی بە هەڤاڵ ئیبراهیم بەخشی و چی لێ سەندەوە؟ 

هەڤاڵ ئیبراهیم: هونەر ڕێز و خۆشەویستی خەڵکی بە من بەخشی و وای لێکردم چەند ببەخشم لە هونەردا بۆ خزمەتی بیسەرەکانم و هونەری کوردی کەم بێت.

ئاڤا نیوز:‎ لەڕووی بواری بەرهەم هێنانی کاری کلیپ کوردستان لە چ ئاستێکدایە ؟ 

هەڤاڵ ئیبراهیم: بە گشتی باشە و کاری باش دەکرێت، بەڵام بێگومان حەزدەکەین کاری باشتر بکرێت.

ئاڤا نیوز: ‎وەک هونەرمەندێکی کورد بەکار هێنانەوەی ئاوازی نەتەوەکانی دیکەلات ئاساییە؟ 

هەڤاڵ ئیبراهیم: بەڵێ بەڵام گرنگە گۆرانیبێژ هەمیشە گۆرانی نوێ دروست بکات.

ئاڤا نیوز: ‎تا چەند لە کارەکانتدا هەوڵدەدەیت ئاوازی فۆلکلۆری کوردی بپارێزیت؟ 

هەڤاڵ ئیبراهیم: بەردەوام لەسەر ئەو بابەتە کاردەکەم و لێکۆڵینەوە دەکەم بۆ هەر بەرهەمێکم کە کاری لەسەر دەکەم  چونکە فۆلکلۆری کوردی زۆر زەنگین و  جۆراوجۆرە. 

ئاڤا نیوز: ‎بوونی ئامێری باشی تۆمارکردن بۆ هەر بەرهەمێکی هونەری لە چ ئاستێکدا دەبینیت، پێت وایە لەو ڕووەوە ستۆدیۆکان لە ئاستێکی باشدان؟

هەڤاڵ ئیبراهیم: بێگومان بوونی ئامێری باش و پێشکەوتوو زۆر گرنگە بۆ بەرزبوونەوەی ئاستی کوالێتیی میوزیک و گۆرانی وە ئێستا ستۆدیۆی باشی تۆمارکردن لە کوردستان هەیە.

ئاڤا نیوز:‎ پەیامی هونەریت چییە بۆ ئاڤامیدیا و دەتانەوێ چۆن خزمەت بە هونەری کوردی و هونەرمەندان بکات لە وەرزی نوێدا؟

هەڤاڵ ئیبراهیم: هیوای سەرکەوتن بۆ ئاڤامیدیا دەخوازم، باوەڕم وایە بە دڵسۆزی کارەکانیان دەکەن بۆ خزمەت کردن بە هونەری کوردی.