یەكگرتوو و كۆمەڵ و نەوەی نوێ لە كۆبوونەوەكەی ئەمڕۆی ئەنجوومەنی وەزیران بەشدار نەبوون

ئاڤا نیوز

 

هەرسێ فراكسیۆنی یەكگرتووی ئیسلامی، كۆمەڵی دادگەری و نەوەی نوێ لە كۆبوونەوەكەی ئەمڕۆی ئەنجوومەنی وەزیرانی هەرێمی كوردستان لەگەڵ وەزیر و نوێنەری فراكسیۆنە كوردستانییەكانی عێراق بەشدار نەبوون و گوتەبێژی حكومەتیش ئاشكرای دەكات كە سەرۆكوەزیران مەسرور بارزانی سەبارەت بە بەشداربووانی كۆبوونەوەكە چیی گوتووە.

 

چیرۆكی سەرەكی: بۆ گفتوگۆكردن سەبارەت بە پابەندنەبوونی حكومەتی عێراق بۆ دابینكردنی شایستە داراییەكانی هەرێمی كوردستان و خستنەڕووی پێشنیاری كشانەوەی كورد لە بەغدا، داوا لە سەرجەم وەزیر و فراكسیۆنە كوردستانییەكانی عێراق كرا ئەمڕ لە كۆبوونەوەیەكی نائاسایی ئەنجوومەنی وەزیران بە سەرپەرشتیی سەرۆكوەزیران مەسرور بارزانی ئامادە بن، بەڵام هەرسێ فراكسیۆنی یەكگرتوو، كۆمەڵ، نەوەی نوێ ڕەتیان كردەوە.

 

لێدوانی فەرمی: مستەفا عەبدوڵڵا، سەرۆكی فراكسیۆنی یەكگرتوو لە پەرلەمانی کوردستان بە ئاڤا میدیای ڕاگەیاند: فراكسۆنەكانی یەكگرتووی ئیسلامی و كۆمەڵی دادگەری و نەوەی نوێ، ڕەتیان كردووەتەوە لە كۆبوونەوەكەی ئەمڕۆی ئەنجوومەنی وەزیران بەشدار بن.

 

بۆچوونی لایەنی بەرامبەر: سەبارەت بە ئەو لایەنانەی كە بەشدار نەبوونە لە كۆبوونەوەكەی ئەمڕۆ، پێشەوا هەورامانی، گوتەبێژی حكومەتی هەرێمی كوردستان بە ئاڤا میدیای ڕاگەیاند: ئەم كۆبوونەوەیە بۆ ئەوەیە كە گفتوگۆ بكەین بۆ ئەوەی بزانین چارەسەر چییە سەبارەت بە ئەوەی بەغدا بەرامبەر بە خەڵكی هەرێمی كوردستان دەیكات، سەرۆكوەزیرانی مەسرور بارزانی لە كۆبوونەوەكەدا بە ڕوونی گوتی، ئەوانەی هەست بە بەرپرسیارییەتی دەكەن ئەمڕۆ لە كۆبوونەوەكەدا ئامادەن.