پڕۆسەی دابەشکردنی زەوی بەسەر فەرمانبەران فراوانتر دەکرێت

ئاڤا نیوز

 

دوای 18 ساڵ لە ڕاگرتنی دابەشکردنی زەوی، بە بڕیاری حکومەتی هەرێمی کوردستان لە ساڵی 2024 پرۆسەی دابەشکردنی زەوی بەسەر فەرمانبەران دەستیپێکردەوە و ئەمساڵ پرۆسەکە فراوانتر دەکرێت، بەهۆیەوە سەدان هەزار فەرمانبەر و خانەنشین لێی سوودمەند دەبن.

 

وێنە گەورەکە: بەگوێرەی پلانێک وەزارەتی شارەوانی و گەشتوگوزار، زیاتر لە 300 هەزار پارچە زەوی لەسەرجەم ناوچەکانی هەرێمی کوردستان بەسەر فەرمانبەر و خانەنشینان دابەشدەکات، لە قۆناغی یەکەمدا زیاتر لە 10 هەزار کەس سوودمەند بوون و ئێستا مامەڵەی خاوەندارێتی زەوییەکان دەکەن.

 

لێدوانی فەرمی: سەربەست مەولوود، بەرپرسی بەشی یاسایی لە وەزارەتی شارەوانی و گەشتوگوزار بە ئاڤای ڕاگەیاند، "بەهۆی ڕێکارە ئیداری و هونەرییەکان دابەشکردنی زەوی کەوتە کۆتایی ساڵی 2024، بۆیە ڕەزامەندی نزیکەی 16 هەزار کەسمان ئاڕاستەی شارەوانییەکان کرد و زیاتر لە 10 هەزار پارچە زەوی دابەشکراون."

 

ئەوەی پێویستە بیزانیت: ساڵی ڕابردوو لە چوارچێوەی قۆناغی یەکەمی پرۆسەی دابەشکردنی زەوی، فەرمانبەرانی هەولێر، سلێمانی، دهۆک، زاخۆ و ئاکرێ زەوییان پێدرا، بڕیارە ئەمساڵ پرۆسەکە فراوانتر بکرێت هەموو ناوچەکانی هەرێمی کوردستان بگرێتەوە و سەدان هەزار کەسی دیکە زەوی وەرگرن.